شعراء سبر

هاذا زمـانن قـلّ فـيه الرجـاجـيل

هاذا زمـانن قـلّ فـيه الرجـاجـيل 
            واصبحت ادوّر فالرجاجيل رجال 

رجال ماهو نص والاّ رجيجيل 
             كامل جمعها دين واقوال وافعال 

رجال سابق فالمراجل على الجيل
                لا والله الاّ سابقن كل الاجيال

رجال حافظ دين رب الابابيل
         يمشي على السنه الي يوم الاهوال

رجال دايم يذكر الله بتهاليل
               هرجه من الرحمن ذِكر وتهلّال

رجال يحفظ سورة الحمد للفيل  
           ويلحق صيام الشهر ستّن بشوال

رجال ما يقبل مع عدلته ميل
            مامال لو ان الزمن عارض ومال

رجال ما يسمع من القال و القيل
          وفي مجلسه ماتسمع القيل والقال

رجال راعي وجار راعي معاميل
                 ما يطبخ الدله علي نار عمال

رجال وان كثرة عقود المحابيل
                     فتال لعقود المحابيل حلاّل

رجال يصهل لا هرج كنّه الخيل
             قوله من الحكمه ولايعرف اهزال

رجال مايشري بسوق الاباطيل
              صادق ويازن كلمته وزْن مثقال

رجال لامنّه حضر كنّه اسهيل
              قدّا برايه كل غادي على الجال

رجال يـبرك للـثقـيلات ويـشيل
            لامن زهمته يرخي المتن ثم شال 

رجال لا جنّه همومه مقابيل
           ما يشتكي حاله على عم او خال

رجال يردع كل من جاله ايعيل
             عيّال ومايرضى الغليبه اذا عال

رجال فيه امن الشجاعه تهاويل 
            وله عزتن ترقى على راس ماطال

رجال ثابت فالمواقف قوي حيل
                ما زعزعه عن موقفه هز زلزال

رجال ما يرقد نهاره مع الليل
              نومه كما سرحان وعيونه اهلال  

رجال ماخاوا رخوم ومهابيل
                  ينقى خويه مثل حبّن بمنخال

رجال طبعه حلو ماهو بتمثيل
         في وصف طبعه تنظرب كل الامثال

رجال يجزل بالعطا كنه السيل
              خيره كما وادي حنيفه اذا سال

رجال مايذبح لك الّا من الحيل
               وماجنب الظيفه ولو قل به حال

رجال ماحط إلْـه قـذله على ذيل 
                ويجرّ ثوبه من ورا جرّ الاذيال

رجال ما يمشي ورا ام المكاحيل
            عيبن على الرجال يتبع هوا البال 

رجال ما ودّي علي وصفه آطيل
        في هالزمن موجود من فوق الاطلال

لا يا زمانن قل فيه الرجاجيل
       وامسيت ادوّر به على الوصف رجال
                                                                               BoBaKeeT@