شعراء سبر

القسايم وزّعوها للكلاب

حدّو الشعب الكويتي للخلا ،!
                   ، ، والقسايم وزّعوها للكلاب ،!

وإصرفوا لكلابكم نوط الغلا !
                   وإصرفوا للشعب نوط الإكتئاب !

وأقسموا لكلابكم قسم الولا !
                   وإقسمونا بالفتن والإضطراب ،!

وان لفاكم كلب قولوا: يا هلا
                   وإن لفاكم شعب قولوا: يا تراب

خابرين اللي شرب واللي كلا
                   لكن آخر همنا زاد وشراب ،!

دامنا للمجد بالدرب إعملا
                   ما ردعنا سوط من ذل وعذاب

البلا بالظلم ، والظلم البلا ،!
                   والعدل لو نتبعه يطلع سراب ،!

والفرح كنّه عن الديره جلا
                   والهموم أركت علينا بالحراب ،!

من كثر ما الشيب بالروس إمتلا
                   ، ، ما نفرق بين شيبان وشباب

لكن الشرهات ما توقف على:
                   من يساوون الكلابه بالذياب ،!

ما بقى لحروفنا روح وحلا
                   دام ما نلقى من الشعب الجواب

جاوبوا من قال: هيا للعلا
                   قبل يصبح قصر عزتنا خراب

آتصبر غير قلبي ما سلا
                   والصقر طلعه مهو طلع الغراب

يا وطنّا لا ولا وألفين لا ،!
                   لا تظن إنّا دعاة الإنقلاب