شعراء سبر

مجلس الشيبان

مجلس الشيبان فيه العلم واعلومن هوايل
           لا يفوتك يا ولـد درس المراجل و الرجالي

إحضره واصمت وأنصت لسّوالف والمثايل
          واحفظ الدّرس وتأدّب وانهل العلم الزلالي 

علمهم شال الحياة اللي مضت ويّا لوايل
         شال مالا شالِـته سفْن البحر والّا الرمالي 

علمهم منهج رجالن فـانيه من قِدم وايل
           منهجن مـا يَدْرسونه فالدراسات العوالي 

المدارس عـلـمها مـا نـوّر اظـلال الـقـوايـل 
        واللحى البيضا مدارس نوّرت سود الليالي

الـشّهـايد علـمـها عـقْب التـخرّج مـنْـك زايـل
      واللحى البيضا تجيب العلم راسي كالجبالي

في مجالسهم تواريخ القبايل و العوايل
            من عهد نوح النبي حتى زمانن لايزالي 

ما تراكم من مناهيج البشر قولن و قايل
          سلسله متسلسله من سلّمن بالمجد عالي

والشجاعه والكرم والطيب واسلوم القبايل
           والكرامه والبطوله والحمول اللي تشالي

والغنيمه والعزيمه والشكيمه والصمايل
              والذّهـانه والفـطانه والامـانه والمعـالي   

والتجارب والشوارب والمغارب والدلايل 
              والعزاوي والنّداوي والبلاوي والكمالي 

كلها في راس من شبّت على راسه فتايل
       لين صار الشيب في راسه كراريس المقالي

يا ولد خل الدفاتر وازهم الشايب وحايل
           حايله يعطيك مـمّا شاف بعوامن خوالي

واستلم سيلن من الماضي على دنياك سايل
       يعجب الرعيان نبـته والدبَـش واهل الحلالي

وان رئـيته حال ضعفه شيـبتن والعود مايل
         لا يغرّك ضعف حاله إبكِ من حالك وحالي

يا ولد هاذي نصيحه كنّها وبل الهمايل
         مجلس الشيبان من خلّاه فيه الحظّ مالي

قلتها من دون لا اطلب دنانير وبدايل     
        والنصايح من قديم الناس تشريها بـمالي
 @BoBaKeeT