شعراء سبر

ضمير الحر

مرحبا ياهجوس الشّعْر ترحيب ضيفي
          عنْد شيخن مظيفه من كبار المظايف

إقلطي في مظيفن ما يقلّط خفيفي
         غير سمْن وسمينه في مظيفه خفايف

واسلمي بالطواريق القديمه وظيفي
           فوقها ما طرالي من جديد اللطايف

علمن اقشر ولكن فيه شيٍ طريفي
            واللي عفتيه منها ماعليها حسايف

قالو ان الخليجي شدّ خيط العريفي
          والعريف المسمّى صار خيطه لفايف

حول ثوب الشّعب لفّه وخيطه ضعيفي
      مثل عوص النضا والخيط مثل السفايف

الشّعب في طريق العزّ سنّد منيفي
               يعتلي كلّ حرّ و يعتلي كلّ نايف

ما يبي غير حقّه من طحين الرغيفي  
          لجلها ساق نجْبا من خيار العسايف

والذلول الاصيله لو عليها رديفي
            تقْطع اللال مايونس ظهرها كلايف

والذلول الرديّه ما عداها رزيفي
             لو رسنها يقوده كاملين الوصايف

ياخيوطن من السّلك الحرير اللطيفي
       واخر السّلك فيه الليف شال الخطايف

الشّعب ياعريف القوم ماهو كفيفي
          يوم عينك تقول الشّعْب مافيه شايف

ياشعوب الخليج العلم ماهو نظيفي
           كان حنّا بقينا في شتات و طوايف 

العريف ان خذا تمْر الحسا والقطيفي
        عقْبها فالقصيم الخيط يا نجد طايف!

ليته الثور الاحمر قال الابيض حليفي
          كان ماراح دمّه عقْب الاسود نطايف

مايسود الاسد في وجْه جمعن لفيفي
         كيف لو صار جمعن يحتزم بالرّهايف

هكذا دايم اللي بالنظام الوظيفي
           ودّه انّ الشّعب دايم شتاتن وخايف
 
لا يظنّ انّها دايم ربيع و مصيفي
         كم ربيعن رماه الشعب رمي القذايف

اشهد ان قلعته ماهي بفرقا وليفي
             يوم عيني بعدها تستبيح الذرايف

يوم فرقاه عرس المحصنه والعفيفي
        عقْب خمسين عامن كان للعرس عايف

قلت مافي ضمير الحرّ نسْل الشريفي
        واستكنّت جروحن في ضميري رعايف
BoBaKeeT@

أضف تعليق

أضغط هنا لإضافة تعليق