شعراء سبر

قِطر قطْر النّدى

لا يغيب إلا لكي يعود مشبعاً بالشعر.. ذلك هو “بوبخيت” الشاعر الذي لا تجد قصائده فضاءً يستوعب طيرانها / .. وهنا قصيدته “قطَر قطْر الندى”.. التي خصّ بها سبر :    


ماعاش من لفلف عصاةَ الطّاره
                 مـرّه يـمـين و مـرتن بـيـساره   
سايق غشيم وضايعن في دربه
                  والظاهر انه زايدن بعياره !  
يبغى الطريق المستوي لكنّه
                     ماله جدا الّا عنا مشواره
تلعب به الافكار لعب الكوره
                  في ملعب الهزله بلا صفارة
عقْب الطريق اللي غدا هاجوسه
                    عوّد على دربن يودّي باره
تصحى بعد ردي وردي والم
               من يوم جتني بالرسايل شاره
ردّن من اللي فالبحر له عاده
              لاغاص يكشف له كنوز اغواره 
يخـتار منها درّتّـن مكـنونه
                 تصعب على من دوّر المحّاره
القول غيثي واستلم ياصاحي
                   همّالها فوقك تسيل امطاره
اليوم جاك الموت ياشاعرهم
                  دونك بيوتي غارتن معْ غاره
الحرب ردّن للنقا يا خاين 
               واشعب ذلولك وارسِل السبّاره
وان ثارت الهيجا صباح المعنى
                 فكري هواجيسه تثور اغباره 
ياديش لا تقْرب قطر واحدوده
                إلزم حدودك لا تبيح استاره !
جاره على الأمّه عظيمن جوره
                 حيثه بعد ما حرّر استعماره!
بنشدك عن بنتين معْهن ثالث
                   ما زارهم ركبي ولا بحّاره ؟
اربع عقود الجور يرثع فيهم
                   وين الذي يفشر علينا كاره
واللي نهانا عن ذنوبن عنده 
                  يا كبْر ذنْبه ياعرب معْ عاره
بيته من الشفّاف كاشف سوره
                واللي رماهم ظافيات اسواره
مهْبول واحيوده ترا مرتدّه
                بيـته قـزاز ومبتـلينا احجاره!
حشّمت نفسي عن رزايا قوله
                    علّه يشيل اوزارنا واوزاره 
والمجلس اللي ترتجف جدرانه
                  لولا قطر ماصمد باعصاره
مرحوم من اسّس ومن نادانا
                 نبني معه واجدارنا باجداره 
هاذي قطر قَطْر النّدى للأمّه
               من خيرها تنعم جميع اقطاره 
حتى الذي حوصر بعيدن عنها
                 جابت قطر للمسلمين اخباره   
وانشد اهل غزّه بعد حاصرها
           شارون والحصني يزيد احصاره   
منهو وقف بالمال والّا جاهه
                   يوم الطفل عينه تهلّ اعباره
واسيادها ساده عريبة مجنى
                   نسْل التميمي للعدو كـرّاره
المصطفى فيما يصح ذاكرهم
                قومن شديده وادرسوا اذكاره 
منهم( تميم ) الحاكم المتواضع
                 اللي من اهل المعرفه اشواره
فعله فبوه امكـرّم الجديني
                  درسن كبير ومعتلي مقداره
مايعرفه جاهل جهول امجهّل!
                    المعرفه عنده حدود وزاره!
هاذا( نعيم ) اللي يبثّ انعامه
              يوم العرب ثارت جموع احراره
سخّر منابر للحقيقه تصدح 
                    يوم المنابر عندكم جوّاره!
عن نصرة المظلوم ما زوّرها 
              مثل الذي عندك غريب اطواره
عبْريّتن بالصوت حتى الصوره
          أن تكذب اكثر يصْدق استمراره!
الحاصل انه ياقطر من قومن
               من فعلكم مثل النسا مغتاره
حسدن مع الغيره يطيع ابليسه
             وابليس ذنبه جا من استكباره
وانتم خذيتوا بالعلا عنوانه
                تشهد لها نهضتكم الجباره
ياهلْ قطر حذْرا من الحسّادي
                 اللي عليكم ارسلوْ عبّاره !!
واللي نواكم ياقطر في شرّه
                     قد قيل فيها دايره دوّاره
دونك تميم ودون شعب الدوحه
       هاضت من اكويتي صدوق اشعاره
عنده تسائل حايسن بافكاره!
               وافكار غيره حايسه محتاره!
كيف العفو يبطي بدار العفّه؟
              عن ذيبنا ابن الذيب يا امّاره!
واختامها صلّو على هادينا
                  اعداد ما جا للحرم زوّاره .

                                 @BoBaKeeT