شعراء سبر

ألأثر دلّ البشر صوب المسير

ألأثر دلّ البشر صوب المسير
                     والبعر دلّل على اللي يبعرا

واللي ينهق من سلالات الحمير
                والذي يصمت عن الحقّ اقشرا

والطعن بالمحصنه أمرن خطير
                  ما هو امرن بالسّوالف عابرا

من طعن يبشر بشرّن مستطير
                   في جهنم فوق وجهه جرجرا

وانت يامن حاجتك فوق السرير
                دلّني صوتك على اللي لك جرا

تطّرب مثْل اللي حاضنتن عشير
                   سابقه تسعه و جاها عاشرا

لهجتك من بيئـتك فيها زفير
                       والسفاله بـيئـتك يا زافرا

تحسبن الناس مثلك يا دشير
                   عرضهم مهتوك ليله سرسرا

من رميته في ظلامك تستـنير
                    وانت ليلك فاحمن يا فاجرا

كان عرضك فالعماير يستدير
                    والمعارض تعْرضه للي شرا

عرض شيخ النّبْل حافِظْه القدير
                  حيث شيخ النّبْل حبّ القادرا

مايضرّ الشّيخ كلبن مستعير
                    له لسانن بالشتيمه حاضرا

يرمي المحصن بداءه والحقير
                      ينّسل منها بعد ما جاهرا

له جانحن ماكفخ لنّه كسير
                   والكسر بالعرض ماله جابرا

والثريّا ماوصلها من يطير
                       يرتـفع لكن مصيره لـثّـرا

والقزم عند الهرم يبقى صغير
                    لو ركب فوق الهرم ما يكبرا

والهرم عند القزم يبقى كبير
                    لو ركب فوقه قزم ما يصغرا   

يا نبيل النّبل من نبلك يغير
                    كيف لا وانت النّبيل الذاكرا

لك من اسمك بالنّبل حظّن وفير
                   خافيٍ بعضه وبعضه ظاهرا

عايش لْدينك ولا تبغى خشير
                      معْ كتاب الله دايم ساهرا

داعيٍ لله حاسب للمصير
                   خايفن من يوم تعما الابصرا

وانت في جيلك قليلن في كثير
                    نادرن بالجيل نِعم الصّابرا 

وانت من جيلن على دينه بصير
                    وارثـه مـن كابرن عـن كابرا

وانت لك في منبرك صوت الزئير
                    صادحن بالحق فوق المنبرا

وانت علْمك قارح البير الغزير  
                     يارده من كان بيره ضامرا

وانت علْمك غيمتن فيها صرير
                 فوق ارض الجهل دايم تمطرا

تعطي الارض الجهوله لون غير
                 كلّ اصفر عقْب علْمك اخضرا

من لسانك ماظهر غير العبير
                     هاديٍ مهدي فوادك اعطرا

ربّتك امّك على خيرن وخير
                    خير من دنيا و دينن عامرا

يرحمك ربّي عدد ماطار طير
                    يا طهورن خلّفت ليث ازورا 

اشهد انك طاهره جسْم وضمير
                طاهره من طاهره من طاهرا 
بوبخيت
BoBaKeeT@

أضف تعليق

أضغط هنا لإضافة تعليق