شعراء سبر

سلام الله يا شبه الجزيره

سلام الله يا شبه الجزيره 
                سلامن من أسيرن للأسيره  

بصوتن من ورى سور المذلّه 
               يفوح العزّ من نشوة عبيره  

ينادي كيف حالك يا صبيّه 
           يبي يعرف مصيرك أو مصيره

ينادي والصدى ردّد ينادي
         ويسمع بالصدى ضحكة خفيره   

يقول الصوت لو يوصل وصلها
                من اعوامن قديماتن غبيره

من ايامن بعد رشد الخلافه
                 وهذا حالها وسط الجبيره

فكم من فارسن نادى عليها
              بصوتن يرهب الخيل المغيره

ولكنّه بعد ما غار عوّد
             كسير العين سيفه في جفيره

فلا تزهم ولا ترفع بصوتك
              ولا تسال عن احوال الكسيره

خذوها من ملوْ دنياك عتمه
               بسِم شرع الاماره والعشيره 

وصار الامر فيها بالوراثه
          نصيب اللي ورث من دون حيره

يجيها غصْب وان عيّت ظلمها
             فكم من غاصبن يشهد سريره 

واذا صاحت( منيره )في عزاها
                   قليل اللي عزاويها تثيره

وشفت الناس تخشى كلّ غاصب
             ولعْراض الحصينه دون غِيره

وبه ناسن على وصف الجلايب
            من السوق اجلوبها للحضيره

وناسن دوبها دوب التجاره 
                    غنـيّة مـال بالعزّه فقـيره    

وناسن هايمه في كلّ وادي
             شواحيذ العشا وقت الظهيره

وناسن مشيختها خيّشتها
                 رضوْ بالقلّ لو حبّة شعيره  

وناسن دينها من سلطنتها
                  يحلّون الخمر لاصار بيره

وناسن بالشجاعه دندنتها
                 رخوم الحرب لامن دقّ زيره

وناس وْ ناس والدنيا غريبه
             صفت للّاش والنفس الحقيره

وقول ان كان هذا في زماني
               حرام انْها على مثلي كبيره 

زماني غير ياحضرة خفيري
             أنا واعي على علم و بصيره

وصوتي لا تقول انه غدا بي
               كثير اللي على موجة أثيره

جماعه لو تفرقنا حدودي
              لنا نفس الهدف في كل ديره

لنا احلام تشبه للحقايق
                ولو طال الزمن فالامر خيره

يجوز ان الحلم يكبر معانا
                كما مهره بعد فلوه صغيره

ومن فحّل قعوده وسط ذوده
              بعد خمسه ظرب ذوده بعيره 

ونا حرّن عرف تاريخ جدّه
               ولا امشي على جرّة مسيره

واذا جدي طحن حبّه عدوه
                 ترا الدنيا رحاتن مستديره

ورثت الاسر والقيد الحديدي
                ولكنهن على غيري خطيره

أنا من دون سيفي و البنادق
           بعلمي ضرب سيفي والذخيره
 
فلا سور الأسر يمنع وصولي
                ولاني من يهابون العسيره

مدام العلم عندي والشجاعه
          مصير السور يخضع لي أميره 

ونا لي فزعتي لوطال اسري
           إذا ما صوّتت باسمي( منيره ) 
بوبخيت
 @BoBaKeeT                          

أضف تعليق

أضغط هنا لإضافة تعليق