شعراء سبر

فالصمايل يثبت الحر الاصيل

فالصمايل يثبت الحر الاصيل
             ما يهمه من تخاذل او خذل
ما يهمه لا كثير و لا قليل
            لو خسر ربحان لكن بالاجل
لامشى صامل ولو دربه طويل
         والدروب اتهاب من فيها صمل
في طريقه لايهس و لايميل
              ثابت الخطوه ولا فيها زلل
 
وان وقف يظهر لنا ظلن ظليل
                  له فيايا كنّها ظل الجبل
ماترجى خير من كف البخيل
         وما يدنّس هامته وسط الوحل
دامها الاقدار في حكم الجليل
               ما حسب لرّزق والّا للأجل
والوثايق لعبة اللاش الذليل   
              مسرحيه والثعل فيها بطل    
فصلها الأول كشف وجه العميل
          وانكشف من كان يلزم بالطبل
بيّن الوجه اللي مافاده غسيل
            لو على القلّه سحابه تنهمل
وانعرف وجه الدمامه والجميل 
              قبْل لا خام الستاره ينسدل
يوم هكتور انتصر نصرن هزيل
              الفرح بالنصر ليله ما كمل
جاته الشّلفا عديمه من أخيل
        خلّته في وسط جيشه منسحل  
الغضب بركان يالراس الهبيل
            شوف طرواده بلاها من زعل 
لو يثور الضلع وديانه تسيل
           من حمم والنار ما تعرف ملل  
تاكل اليابس واخضرها يحيل
           بعدها ما ينفعك ويش العمل
مايفيدك لا وصل يوم الرحيل
               ليتني قدّامها حطّيت حل
قالها بن تيميه من عرض قيل
            ما ثِبت حكم الدول الا العدل
ومن ظلم حكمه بعد ظلمه يزيل
             هكذا الشّرع الالهي بالدول
واللي قال الحال مايبغى بديل
               الدبش همّه شرابه و الاكل
إلحقو ثوب العروسه والكليل
              لا يضيّعها هبيلن و الخبل 
العروسه مهرها وزنه ثقيل
                والثقيله ما لها الّا الجمل
يا عرب ما فيه شيٍ مستحيل
      من مشى دربه وهو صامل وصل
ما غدينا مير ضيّعنا الدليل
               يوم طوّلها تغشّانا الكسل 
الطريق اوضح من الجوزا وسهيل
          مير يبغى له معَ المسرى رَجل  
بو بخيت
 @BoBaKeeT