شعراء سبر

يا راعي الفنجال عدّه يمّ كرّان

يا راعي الفنجال عدّه يمّ كرّان 
             للي مثل كرّان يصلحن الفناجيل 

سلطان لامن قام وفي مركاه سلطان 
      مثله قليل الصنف في جنس الرياجيل 

إسمن خذاه العود في ماضين الازمان
        يوم العرب من فوق ظمّر تسبق الخيل  

كرّار قدام الرّمك ما هاب الاكوان
             مافرّ في يوم التصامخ بالمصاقيل

نسلن تسلسل من سلالة عزّ عجمان
           صبيان يام اللي صبيهم يعدل الميل 

ياويّ منهم لا غدا فالجوّ دخان 
          من عجّهم يظلم صباح ويشتعل ليل

من باب صنعا لين تاصل باب عمان
            أذكارهم فيها تعدّى الجدي وسْهيل 

شبه الجزيره كلها واعْوال همدان
             وجهين لتاريخ في نعم التفاصيل

واليوم من كرّان جا كرّان شامان
              مثله سميّه جا وليده نادر الجيل

هاك السعد نعم الولد بالعزّ بطران
              شرّاب فنجال الشكاله والمشاكيل

فالماقف الغصاب جنبه جنب مليان
         جنبن متين الظلع وقت الحط والشيل

عالي كما نجم الثريا فوق لا بان
           مايخضع الا في سجوده والتهاليل

حلون على الصاحب كما قلمان برزان 
               واللي يعادونه عليهم مرّ بالحيل

أشهد شهاده يا سعد ياعالي الشان
           إنك عزيز الراس من روسن حلاحيل

خصمك خبيث النفس ماهو ندّ فرسان
       مايستوي راس الجمل معْ سافل الذيل

يوم العبوها بالرّدى حاتم وكوبان
          يبغونها تستر على شرطان تسجيل

مير الفضيحه بيّنت سارق وخوّان
          بالصوت والصوره ولا تحتاج تاويل

من عاش بالحيله يجيه الموت فقران
           لو ان رصيده ما يشيله حادر السيل

وان كانهم تِفتح لهم فالقصر بيبان
               اقلوبنا لك يا سعد لجلك مداهيل

ماكنت فينا يا سعد خاين وسرقان
          كنت الامين اللي فضح أهل المحابيل   

شلت الحمول اللي عجز عنها بليهان
            واشعلت روحك لجلنا مثل القناديل

ضحيت يوم التضحيه غاليةَ الاثمان
               يومن غيرك تضحياته زور تمثيل

ربحان لوّ الجرح غاير منت خسران
             يكفيك ما دنّس شرفْك القال والقيل

واليوم جرحك جرحنا لكنّ شتّان
             ما بين من يفزع ومن دربه تحاويل

ما كل طيرن فالسما من ظلع حوران
         بعض الحرار الطايره صارت مراسيل

وما يذبح الرجال غير ان جاه خذلان
        من صاحبن قد كان يعطي وافي الكيل

ضاقت ولكن الفرج من عند رحمن
                  يا جعلها تفرج فالايام المقابيل

الله على الظالم عساه يعيش الاحزان
               والموت قدامه ولا هي بالتساهيل

وياراعي الفنجال زلّه وسط رسلان
                  للي مثل كرّان يفخرن المعاميل
بوبخيت 
                                 @BoBaKeeT

أضف تعليق

أضغط هنا لإضافة تعليق