شعراء سبر

ما كلّ مثقال فالميزان جا غالي

ما كلّ مثقال فالميزان جا غالي
شيٍ يجيب البعير وشي ماجابه

والناس ميزانها معروف الاثقالي
بالمرجله قيسها في وزنة اللّابه

والمرجله وزنها بالطيب يكتالي
والطيب قصر المراجل والكرم بابه 

ما هو كرم درهم الرجال و ريالي
لا والله اللي من اخلاقه ملا احْسابه  

واللي جمع طيب مير الجيب جا خالي 
لا صار طيّب ترا الإفلاس ما عابه

ما كان طيب الفتى بالجاه والمالي
الّا الذي يصرفه ما دوّر اتعابه

اللي على ربعه الادنين همّالي
يسقي ودادين من طيبه على اقرابه  

يا باغي الطيب ما قد صار رجالي
من كان ماله رصيدن كامل انْصابه

النقص في كفّة الميزان ما مالي
لوّ الدراهم على الميزان صبّابه

والطيب عيّا على اللي جاه يحتالي
لا يحسب ان الرّدا والطيب متْشابه

الطيب راس الحجا والمرقب العالي
ما كلّ رجال عدّابه و غنّابه

يرقاه رجال ما يشكي من الحالي
رجله على الطيب فالظلعان وثّابه 

واللاش ماله على المرقاب مدخالي
مثله ظلال الحجا لا مال يغدابه

اللي على عصبته منفوس متعالي
وعند الاجانيب مثل الكلب فالغابه

ياكل جيَف عصبته في جلسة انذالي
لا شاف فيهم وليده راح يغتابه

سمّاع نقّال كذْب القيل والقالي
في جلسة الزور سمّه في طرف نابه

لا شاف زلّة قريبه طار طوّالي
بين الاجانيب قدْمه يلتوي دابه

وا عزّتي له مريض النقص والفالي
مفضوح بين العرب وان بدّل اثيابه

يبني على غير ارضه في خلا اللالي
يرفع عموده وبيته يشلع اطنابه

دسّاس بلّاس بين الناس جوالي
له طبْع خبْث النسا وان فتّل اشنابه


الطول طول النخل مير العقل زالي 
روّح مراح القطا من بندقن صابه

مسكين يبغى النعم من دون الاقبالي
قد قلتها راس عيطا صعْب يرقابه


خشم النعم ما رضا يرقاه دجالي
تقمح خصومه وراس النعم لصحابه

والنعْم من ربنا سبحانه الوالي
يلقاه من خاف ربه حافظ اكْتابه
بوبخيت
        @BoBaKeeT

أضف تعليق

أضغط هنا لإضافة تعليق