شعراء سبر

الفتى دون داره

الفتى دون داره لا نخيته
قدّم الرّوح لو راحت حياته

والنّذل لا نخيته وعْـتزيته
ذلّ ما كنّه الّا من خواته

والبلد تعتزي حيّه و ميته
والشعب مثْل حيٍ في مماته

انهضوا لا رِحِم وقْـتن وعيته
فيه شعب الكويت أعلن وفاته

داركم قالت : البخْنق رميته
يوم ما شفت من ينفض عباته

الحقوا برقعي والّا وطيته
لعنبو من يخلّي واجباته

كان مالي عيالن مستميته
دون عرضي عساهم في شتاته

اربع اسْنين هدّوْ ما بنيته
والبلا كان عادت رابعاته

دام مات الحراك إقرو وصيته
لين روحه تعوّد في رفاته

شاركوا لجل من ذكّا ضحيته
والذي عجّـزتـنا تضحياته

إبْن كِـرّان و مْسلم فديته
وابْن برغش ومن سوّا سواته

يـبْن كِـرّان حنّا لجل صيته
نلعن اللي ذبحنا في سكاته

جاه يوم الحساب اللي يبته
مثل ما بيّت المظلوم جاته

يا مِسلّم سقاك اللي سقيته
كاس عزّ الكرامه من حلاته

ما نسيناك لو فضلك نسيته
في رقاب الشّعب تبقا وصاته

يبْـن برغش قضيت اللي قضيته
وانت مظلوم مقبولن دعاته

أسأل الله يقبل ما دعيته
والله اللي قبوله من صفاته

والشّباب الذي فالسجن بيته
والمهاجر … دياره لايعاته

السياسات ما تعرف يليته
ما نفع ليت من ما راح فاته

يا شعبنا جفاك اللي جفيته
شفتوا العام من يعمل لذاته

كان صوتك لبن عمك نويته
هات رجال يطعن في قناته

لا يجينا مناديب الفتيته
طعمته شيك يلهم من فتاته

ذا مصير الوطن يومك عطيته
لا تجي حاطب الليل و حصاته

إعلم الصوت امانه لا شعيته
لا تقول الذّلول الشوط فاته

ما يفيد العذر لامن رميته
مير خلّ العذر والصوت هاته

ما يضيع الوطن دامك حميته
والفتى من يقدّم له حياته

بوبخيت
@BoBaKeeT