يالله حيهم بديوانهم وألف وألف مبروك علينا فوز الترمبي بالرئاسة على حزب الأصدقاء اللي باعونا حنا يابني يعرب باخر فترات وجودهم بالحكم قالها الرجل .
الشايب : وانت صاج باعونا وهم يقولون معانا اجل وشراح يصير وهم ضدنا ؟
المعاق : عدو بين وواضح احسن من صديق يقرصك من تحت لتحت بحجة الصداقه .
الشاب : كل اللي صار بامريكا شي متوقع وماهو مفاجاة !..
الشايب : أمرك غريب وضح لنا ؟.. ودامك تدري ليه مخلينا ساهرين على التلفزيون ؟.. جان معلمنا ومخلينا ننام مثل خلق الله ؟.
الشاب : أنا مثلكم مادريت الا هالحين من رسايل الواتساب !.. من الصبح ماعندها غير لغز عايلة سيمبسون توقعوا هالشي من خمسة عشر عام مضت .
الرجل : وش يطلعون عايلة سمسم اللي يعرفون كل شي ؟.
الشاب : عايلة سيمبسون مسلسل كرتوني للأطفال كنت أتابعه وأنا جاهل .. يتكلم عن عايلة لونهم اصفر عندهم أربع أصابع مو خمس مثلنا وما كنت أفهم منه شي .
الخبير : شي أكيد العيال الصغار ماتفهمش منه حاجه !.. لانه بالأساس موجه للكبار فقط وهو يعالج بعض المواضيع المؤثرة بطريقة كوميدية وهو من انتاج شركة فوكس .. وبقا له سبع وعشرين سنه وهو يعرض وشخصيات المسلسل لا تكبر أبدا برغم مرور سنوات على عرضه .. والمسلسل عرض احداث كثيرة حصلت بعد سنوات من العرض وأشهرها الربيع العربي واحداث تفجيرات نيويورك .. وعلى رأي احد الكتاب اللي قال”كل شيء مسطّر، كل شيء مقرّر، يتحكمون فينا و في عقولنا و في كوكبنا و اكتشافاته و كوارثه الطبيعية، ويلمّحون لنا بين الفينة و الأخرى بما ينوون و العالم في شبه سبات!!” لعل الرسالة وصلت لعقولنا .
الشايب: قال مثقفين قال اللي يطلعون لنا كاشخين كل ليلة بالتلفزيون من ابو كرفته لين ابو النشاء بغترته اللي كاشخ بساعه كل شوي يفسر كمه عشان نشوفها .. قال مثقفين قال لا ومايكلمنا إلا من طرف خشمه صايرين مثل خالي مناحي اللي حاط دوبه ودوب مبارك كل شوي يقوله تفتهم.. قال مثقفين قال ونحنوا المثقفين وينكم يامثقفين عن مسلسل يتابعونه الجهال ؟.. وإلا دورك ياروح عمتك تشتريه لهم !.. وأنا من خلال ديوانيتنا أطالب اصحاب القنوات ترك هالنوعيه من المثقفين اللي تدفع لهم فلوس عشان ينكدون علينا بأنهم يشترون سيديهات مسلسل عايلة سمبسون ويتابعونها أبرك وارخص من هالمثقفين أهل الرزه وعلى الأقل يعرفون الأحداث وتسلسلها بدل من انتظار وشراح يصير السنه الجايه قال مثقفين قال ولفح .
المتمولس : المال الخليجي منحوس راح للمخلوع تحالف مع الحوثي .. وراح للسيسي فانقلب علينا .. وراح للحريري صوت لعون وراح لهيلاري فاز ترامب في شي غلط.
وفي هذه الأثناء رفع على مسامعنا الشيخ زغلول اذان الظهر .
أضف تعليق