شعراء سبر

يالله تحرمني غثا الليل الطويل

جريدة سبر الإلكترونية

يالله تحرمني غثا الليل الطويل
اللي به الساعه كما عشرة ليال

هاذي ثمان ايام عيني ما تقيل
والليل عصْفه فالمحاجر لا يزال

ليلي كما درب البدو وقت المحيل
من نجد ماشينه ليا حدّ الشّمال

مذكور فيه ان الحيا قـفّاه سيل
طمْيه على الوديان يصفق كلّ جال

والعشب نبته عانق اعناق النخيل
شيح وْ بختري فوقهن زملوق طال

حالو عيله البدْو يقْدمهم دليل
شهرين ما شبّو على صفر الدلال

ما غير تمره والسقايه من صميل
والعفش ذارينه على ظهر الجمال

عجْلين شالو من خفيف ومن ثقيل
خلّو وراهم من يحبون الجدال

شداتهم تقصر عن العشرين ميل
واضعانهم تشكي مرضها والهزال

والحفْر عارضهم كما مشروع ريل
والدرب ماليته طعاميس الرمال

ويوم اقربو ارض المرابع والمسيل
ماعيّنو لا ريف فيها وْ لا خِيال

ما نابهم غير المشقّه والرحيل
غادين مثل اللي دخل سود الدّحال

أثْر الدليله جايهم عابر سبيل
مطرود من قومه على سود الفعال

هذا بعض ليلي والاخر له عميل
متناوبين العين في سمرة سجال

كلّه سبب مهبول من عرض الهبيل
رجال لكن ….. ما نعدّه فالرجال

ماله مع الظفران فالقسمه قليل
ما عنده الا قيل وْ قالت لي وقال

ماهو من اللي لا سمع صوت الصهيل
يسرج عبيّا فالمكاون والقتال

ملعون متْرس فالوغى مافيه حيل
ما شفت في طبعه حميدات الخصال

رابي مع الخفرات منقوظ الجديل
طبعه من اطباع النسا في كل حال

ما فيه ذرّه من شهامه والدليل
يشمت على طيحة صناديد العيال

عايض ابوخوصه دمار المستحيل
اللي رقا روس المعالي والجبال

والصّيفي امْبارك ولا حوله مثيل
حلّال نقّاض المحابيل العضال

ومْبارك الوعلان ما غيره بديل
فالماقف الغصاب شيّال الثّقال

والسّالم النّملان يمنى فالمعيل
ونْشد عيون اللي على الشجعان عال

من فرحة المبدول شامت فالاصيل
شدْقه تماغط واللحي للجنب مال

ما ناقصه الّا جنيهات و كليل
واقول له مبروك يا بنت الحلال

ما ضرّهم ناقص من العزّه عليل
اعراضهم بيضا وصعبات المنال

يا ربعنا بالله والصبْر الجميل
النّصْر فجره مثْل ما يذّن بلال

بوبخيت
@BoBaKeeT

أضف تعليق

أضغط هنا لإضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *