آراؤهم

جانا الخير وكسر جامات سياراتنا !

بادي بدأ يا إخوان أعزي نفسي واعزيكم بوفاة أحد أعضاء ديوانيتنا المرحوم بإذن الله عبيد أبو سامي غفر الله له ولنا ولأخواننا القرّاء الكرام .
قالها الشايب ثم ألتفت يمين حيث مكان الخبير وقال له : هات ماعندك ياخبيرنا كلنا اذان صاغيه لمجهودك اللا محدود .
الخبير : بصو يا حضرات موضوع اليوم عن تطاير الحصي بعد هطول الأمطار !.. وعلى ما اعتقد مافيش حد بالكويت ما عناش من المشكلة دي ؟!.
الرجل : هات حييت ياخبير أطربنا باخر الأخبار .
الخبير : خبر النهرده بيقول على لسان الوكيل المساعد لقطاع التخطيط والتنمية المتحدث الرسمي لوزارة الشغال العامة انهم تعاقدوا مع مختبر النقل والابحاث البريطاني لتصميم الخلطة الاسفلتية وفق احدث المواصفات لمنع تطاير الحصى .. وأكد بأن الوزارة قامت قبل سنه بتنفيذ طريق تجريبي ولله الحمد ثبت نجاح التجربة .. وقريبا ستعمم مواصفات تلك الخلطة لاستخدامها في مشاريع الصيانة المستقبلية في حال توافر الميزانية اللازمة .
الشاب : يعني مو كافي مستخدمي الطرق بالكويت زحمة الشوارع  وضيقها !.. طلعت له  مشكلة تكسير الشوارع اللي صارت أشبه بالطرق البرية وتضاريسها .. ياسبحان الله جنهم موعودين بالهم والغم من يركبون سياراتهم .. اللهم يا كافي السيارات الجديدة استهلكت وتكسرت وكل هذا يقع على عاتق وزارة الأشغال لانها هي المسئولة اولا وأخيرا .
المعاق : عمار ياوطن والله لايواثمنا لان بسبب هالشوارع كرهنا نزول المطر لانه يكشف عورة شوارعنا ويخليها ماغير صخور طايره .. ماكو سيارة الا وجامها الأمامي متكسر او مشخط شخوط ما تخيط هذا غير المعونيات الفاقسه والهيئة الأمامية المهترية .. وكل ماسبق كوم  والمطبات العشوائية اللي بلا خطوط كوم ثاني  لقساوتها .
الرجل: ومن هذا الديوان العامر باهله أطالب بنزول تصريح من قبل وزارة الداخلية بعدم مخالفة كسر زجاج السيارة نظرا لاوضاع شوارعنا الحالية .. وايضاً أطالب بعدم رد السيارة وقت الفحص الدوري بسبب كسر الجام لان هذا فوق طاقتنا ومالنا دخل بهذا .. ولي رجاء خاص لحفيزات السيارات الجديدة مراجعة أسعار سيارات الدفع الرباعي لانها هي الوحيدة التي تعمر بشوارعنا المتهالكة .
الشايب: في دول فقيره وشوارعها مثل المسطرة على الرغم من الأمطار كل وقت اشمعنى حنا تتكسر وهم لا ؟.. اخاف يطّلع ظريف ويقول كله من الشمس وحرارتها !.. ياجماعة الخير ماله داعي تعاقد مع مختبرات اجنبية ودفع فلوس لها مقابل الدراسة .. لان الحل بالإدراج عندكم بمعني كل اللي عليكم افتحوها وطبقوا اللي موجود فيها بخصوص تسفلت الشوارع لان هالمشكلة ما طلعت الا بهالسنوات الاخيرة !.. وان ما لقيتوا الورق اتصلوا الله لايهينكم بواحد من المتقاعدين السابقين من ذو الاختصاص واسألوه ايام قبل اشلون كنتوا تسفلتون الشوارع ؟.. وأخذوا منه الوصفة السحرية ببلاش مع وعد بعمل احتفالية خاصة له .. شفتوا اشلون السالفة سهلة مايبيلها معاهد ومختبرات ودفع فلوس على عماها وسلامتكم .
المتمولس : وحده تقول لزوجها بروح لجارتي خمس دقايق !.. وانت لاهنت حرك الجريش كل نص ساعه !.
وفي هذه الأثناء رفع على مسامعنا الشيخ زغلول آذان الظهر .