على الطاري يقولك فيه اثنين من الخوال البصامه ( والبصامه أنواع وما أدري عن اللي تحت منهم أو لا ) رحمهم الله وأطال بأعمار اللي باقي منهم قبل عشرات السنين تطوعوا بالفوج والفوج يتبع شؤون الأفواج بوزارة الحرس الوطني السعودي.. وهو يتكون من متطوعين (باب رزق ) ويكون عليهم أمير من نفس قبيلتهم .. ما أطولها عليكم تطوعوا الخوال بالفوج.
وبيوم من الأيام وهم مرابطين بدوامهم طلعوا دورية ( شفتوا الهنا ) !.. ماهي الا دقايق لقولهم واحد يمشي حوالين مكان حراستهم .. على طول حاصروه وركبوه معاهم وأخذوا يستجوبونه بأسأله كولومبيه ( انت وقعت وإلا الهواء رماك ) من أنت وانت شنهو إنس أو جان يقولهم أنا مصري يافندم وهم مصممين على انه بعترف بأنه هندي لانهم مايعرفون كلامه، وعلى بالهم أي واحد لابس بنطلون وكلامه ماينفهم هندي ..
وسالفة الخوال أشوفها تتكرر بالكويت من لدن هيئة الشباب والرياضة التي حلت اتحاد الكرة وعينة لها لجنة انتقالية ( ماهي قادرة تحط جدول دوري) تتطالب الفيفا واتحادات العالم لكرة القدم بالاعتراف فيها مع انها لجنة معينه .. وقوانين الفيفا صريحة بعدم التدخل الحكومي بأي اتحاد يتبعها !.
وهالحين صار لها كم شهر ما خلت شي على أمل الاعتراف بإجراءها حتى خرم الابرة دخلوه .. مع ان قوانين الفيفا واضحة وضوح الشمس برابعة النهار بس وشلون تفهم أهل الفوج قصدي أهل الهيئة بأنهم غلطانين ؟.
وتدور الأيام والليالي وتكثر الأخطاء واللي تبيه الهيئة ماراح يحصل لان الغلط راكبها ركوب ( ما تنزل ياد ) لانها ماعرفت كيف تدير هذا الملف الحساس بسبب عنادها وقلت بصيرتها وعلاوة ذلك وسوسة الشيطان.
ويوم وراء يوم بالإجماع يتبين للكل ان حل مشكلة كرة القم الكويتية هو برجوع الاتحاد المنحل ( شئتم أم أبيتم ) .
واليوم وبعد ان قضت الهيئة على جيل كامل من الشباب قاعدته تبحث عن حل يحفظ ماء وجهها جدام الشارع الرياضي بخصوص خطا حل الاتحاد الشرعي المنتخب.. مع ان اغلب الشارع الرياضي فاهمين كل شي وناطرين الحل !.. المتمثل بشوية تنازل من قبلها بأسرع مايمكن بعيد عن سياسة أهل الفوج اللي يبون المصري يعترف انه هندي وسلامتكم .
أضف تعليق