يقولون والعهدة على الرواة اللي ناقلين لنا الخبر ان فيه مستشار بلدية في بروكلين .. وبروكلين موجودة بالولايات المتحدة الاميركية وين فيه بالضبط الله اعلم, لاني تارك هالموضوع للي راحوا أميركا .. اما انا فالامر سيان لان مايهمني هو الخبر اللي طالب فيه مارك تربيغر, ومطلبه باختصار هو اصدار قانون يقضي بحظر استخدام الهواتف الذكية والاجهزة اللوحية من قبل ركاب الدراجات الهوائية .. ايه والله, يبي قانون ضد اهل القواري اللي يستخدمون تلفوناتهم, ويقول نبي نصير مثل شيكاغو اللي اصدروا مثل هالقانون منذ ثلاث سنوات مضت .. ما اقول إلا الله يكثر من امثالك يالاميركي ويا علك بعد اعضاءنا كلهم بالمجلسين البلدي, والامة اللي ماعندهم شي يقدمونه غير الكلام اللي ماخوذ خيره, والخير هذا له سنين وهو راثع فينا بلا اي جديد, واقتراح مستشار البلدية الاميركي يا الله ما كثر حاجتنا له مو لاهل القواري, بل لاهل السيارات اللي اعدموا انفسهم, واعدموا الناس بالشوارع ضاربين عرض وطول الشارع بكل اخلاق ومهارات السواقة, يادافع البلا ثلاثة ارباع اهل السيارات بالكويت من حريم ورجال مايحلا لهم التيلفون إلا وقت سواقتهم اللهم ياكافي جنك تشوف اخطبوط يسوق السيارة, الجهاز باليدين الثنين والسكان يترنح بين الفخوذ, واكبر مصيبه سواقة الحريم وهذا عاد انا شايفها محد قالي الجهاز بيد وولدها بحضنها على رجولها والسيارة, تتطوح ياحبيبي تطوح تارة باليمين وثلاث تارات يسار لين تضرب بالرصيف وكل هذا اشلون مادري ؟ .. وانا بهذه المقالة اطالب باصدار قانون الهدف منه هو اصدار مخالفات فورية لكل واحد متجاوز غير عابئ بأرواح الناس, يعني الكرة بملعبكم ياممثلي الامة على الاقل, يطلع منكم شي بدل من اللي مسوينه بعضكم اللي مالهم شغل إلا بالاعضاء السابقين, اصل كان مادري شنهو, والي اخر السوالف, اللي مالها داعي من تصيد لاخطاء السابقين. وبالاخير ارجوكم اعملوا لمصلحة الوطن والمواطن ابرك وانفع, وهنيالك يا فاعل الخير وسلامتكم وعليكم السلام.,,,
محمد خلف الشمري
أضف تعليق