سبر القوافي

صوت وصدى

عبدالعزيز السبيل :
في تالي الايام صاير سلام الله له اسباب
لكن سلام الله من اللي سلامه من صميمه
يا محمد الاوراق لو تنقلب في داخل كْتاب
كان النوايا عقب ما تنقلب .. ماهي سليمه
.
.
محمد جارالله : 
كبّ السبب وارحب ترى السالفه ما غير ترحاب 
من فم من يبذل على مرحبا .. شيمه وقيمه
الناس تال الوقت لبست لها ثيابٍ على ثياب ،
وواضح ملابسها الجديده على عكس القديمه !
.
.
عبدالعزيز السبيل :
رجلٍ تذّرى من ورى الباب مايفتح لك الباب
الايام دواره … وعادت لعادتها : ( حليمه ) !
الوقت …. ماله عند من جرّب الايام عرّاب
يقوله اللي ما لقى عند صاحبْه : الغنيمه !
.
.
محمد جارالله : 
والله ما افتح باب نصّاب وادخل بيت نصّاب ،
وعزيمة النصّاب عنها تعذرّت بـ عزيمه !
على مواكر اشقر الريش توجد ريشة غراب ،
ما اذم غير الذم لايق على وجيهٍ ذميمه .
.
عبدالعزيز السبيل :
ما اظن للخانع لو تطيب فيه اصحاب واحباب
راسه مع? هذا وهذا … مثل راس : البهيمه
هقيت باللي ما يجيب الغنايم كل ما غاب
الهقوه اللي من صفى نيّتي مثل الجريمه
.
.
محمد جارالله :
نشرهه على عرهان والزير وابن غانم ذياب ،
ما نلحق المشروه .. راس اليتيم اخو اليتيمه !
بعض الهقاوي شَجرةٍ في طرفها عقرب وداب ،
وانا رجل يغنيه عن ظل شَجرَة .. ظل غيمه .
.
عبدالعزيز السبيل :
مسيّلمه الكذّاب لو كثّر الحلفان كذّاب
نفسه خبيثة لو تستّر ورى النفس الكريمه
اللي ربا في مدهل الطيب يا محمد ولا طاب
عواقب فعوله بتال الزمن شفها وخيمه
.
.
محمد جارالله :
حرار من فوق الحباري وفوق الجيفه ذبْاب ،
علّمني طبوع البنادم واعلّمك بـ نديمه 
رجلٍ مواقفيه على العز لـ ابنا عم واجناب ،
ورجلٍ ما ياقف غير في لازم ابناه وحريمه .
.
.
عبدالعزيز السبيل :
حطيت خلاّن الرخا فوق ضرس ومن تحت ناب 
واعتضت بـ اصْوَك راس وابلج ومطنوخ وصتيمه
اللي اعتبرته ضمن الاصحاب ماهو ضمن الاصحاب
مدري الرفاقه ظلم ولا اعتباري له ظليمه
.
.
محمد جارالله :
الله خلق والله فرق .. والاوادم روس واذناب ،
اتعب على من يطعن الجوع ويذب الخريمه 
حومة شِعر .. عبدالعزيز السبيّل حومة عقاب ،
شاعر عظيم .. وتستحق الشِعر حرب العظيمه