سبر القوافي

زهرة الروض الحزينة

نص مدهش و رائع.. ويستحق التصفيق كثيراً…

سعود بن مهدي الشاعر المخضرم الغائب إعلامياُ، والحاضر بالصفوف الأولى بالشعر.. ينطلق بهذا النص إلى سماء الإبداع والمشاعر والقافية.. الرقيقة الأليمة..

سعود.. ونص يستحق القراءة..

مرةً..

ومرتين..

و10 مرات:

لو طـال (سجـن الضيـق).. والأبـواب عيـت تستديـر ** مـافـوق حـكـم الله حـكـم و دون بـــاب الله بـــاب

ياحـظ لـو ماكنـت عثـره .. فــي طـريـق المستجـيـر ** مــاولله اقـنـع بالنـجـوم ولا بـمــا دون  الـسـحـاب

كبـيـر بــس الـوقـت ! مامـيٌـز كبـيـر ولا صغـيـر ** وعظـيـم لـكـن الـدهـر ؟ مـاعـز ذربـيـن  الجـنـاب

اهـل مـن غبـة قصيـدي (عقـد مــن لـولـو ) وفـيـر ** واصنع مـن الفاظـي ( حلـي ) تغـري طويـلات  الرقـاب

أصوغ من فكري ذهب وأحيك من جرحـي حريـر** واشعل من احساسي وهج وأسكب من خموري شراب

غني قلـم نـدي عطـا.. مـروي ضمـا.. نافـح عبيـر ** مرمـوق .. وألٌبـس بـنـات الفـكـر .. غالـيـة الثـيـاب

سئمـت مـن رتـم الحيـاة وصـرت لأحلامـي أسـيـر ** ومليـت مــن تـخـاذل اقـرابـي ,, وحبـيـت الغـيـاب

اثـر محاتـاة المصيـر ؟ .. تـزٌود غـمـوض المصـيـر! ** واللـي تأمـل فـي اكتئـابـه !! لاصـحـى زاد  اكتـئـاب

طـاح البعيـر ومااكثـر الطعنـات لا طــاح البعـيـر ** وراح الزهـاب و(مكبـر الحسـرات) لاراح الزهـاب

مايظهـر الرجـل الكبـيـر.. الا لاجــا الـيـوم الكبـيـر ** ولايبيٌـن فـي الصعـاب..الا مــن اعـتـاد الصـعـاب

لـو مامعـي (مخيٌلـة هـوغـو) و (نـظـرة فولتـيـر) ** يكفي معـي (سحـر البيـان) وعنـدي (فنـون الخطـاب)

ومـدام فـي يـدي سيـف خالـد بنطـح الجمـع الغفيـر ** وماعاد لي بـك لـزم فـي مغـزاي يـا شلفـا ذيـاب

في نظرتـي إن أطيـب الأوقـات خلـوة مـع ضميـر **يصفى بها الذهـن المـدي ويشفـى بهـا القلـب المصـاب

وأنـادم أقـوامٍ فـي نجـوى الكتـب والذكـر اليسـيـر ** ماغابـت الا اشخاصهـم عنـي ,, وطـاري الـهـم غــاب

مـن لا يجـود بمـا يـجـود بــه الـزمـان ولا يجـيـر ** محروم لـو يملـك كنـوز الأرض و(كنـوزه تـراب)

مـا اقـدر احـب انسـان  كـان بيـوم للعالـم حصيـر ** عـودٍ عليـه (المـا) ماهـو ينـفـع يـكـون الإحتـطـاب

رغم احتياجي (للحنـان الجـم) و(العطـف الغزيـر) ** لازلـت احـس بـ( ـذة الأحسـاس) حتـى فـي العـذاب

رغم انكساري من (ظروف الوقت) و(الحال المريـر) ** لازلت واثـق وألمـح (الأحـلام) حتـى فـي السـراب

رغم ابتعادي عن (جميع البيض) و(الوصـف المثيـر) ** لازلت متذوق وأعـرف (الحسـن) مـن خلـف النقـاب

رغم اعتزالي (ساحـة الشعـر) و (مساحـات الأثيـر) ** لازال فينـي (ألـف معـنـى) ماتضـمٌـن فــي كـتـاب

فـي خاطـري أشيـا كثيـرة.. وأملـك الشّـي الكثيـر ** لكٌـن فاقـد حاجـة أكثـر!! بينـهـا وبيـنـي حـجـاب

ماهـو لـزوم إنـي جميـل.. أهـم شـي إنــي بصـيـر ** لأن (الجمـال بـلا نظـر) مثـل (السـؤال بـلا جـواب)

واذا قـدرت أفهٌـم الغاويـن وش معـنـى الغـريـر؟ ** بالله  كيـف افهٌـم المخطـيـن وش معـنـى الـصـواب؟

مـن لا عـرف معنـى الوفـا مايقـدر يـحـب بضمـيـر ** ومـن لا رقـى فـوق الجبـل مايقـدر يشـوف الهضـاب

ظنـي كبيـر.. ومـومـن بـربـي.. ومتفـائـل بخـيـر ** وان خاب ظني في البحـر ماخـاب ظنـي فـي السحـاب

يـا (زهـرة الـروض الحزيـنـة) لاتحاتـيـن الهجـيـر ** (فراشـة الحقـل) اهتـدت صوبـك وضيعٌهـا الضبـاب

الجـرح الأول طـاب.. بـس المـوت! بالجـرح الأخيـر ** مايندمـل لـو خاطـري؟ مـن كــل مايبغـيـه طــاب

مانـي بـمحتـاج لـ(رغـد دنيـا) ولا (مجـدٍ نظـيـر) ** (محتـاج لـي إنسـان) يفهمـنـي بـهـدوء وبانسـيـاب

زرعـت لجـل اكــون بالـفـي.. وتحمـلـت  السعـيـر ** الغصـن غصنـي !! والثمـر غيـري خـذاه بـلا حـسـاب

وشلون بلقـى لـي (وطـن) وبداخلـي (منفـى كبيـر) ** وشلـون ببنـي بيـت (لأمالـي)؟ وباعماقـي (خــراب)

ماهـو أليـم (احساسـي بغـربـه) ولا حـولـي عشـيـر ** بـس الأليـم إنـي مـع (احبابـي) وعايـش بـاغتـراب

سعود بن مهدي