حبيبتي لا قريتي اخر أبياتي
قولي يقوّه على حزنه ويا صبره
تعبت أجابه همومي بإبتساماتي
لكن شسوّي اذا غصتني العبره
من وين اوجّه طريقي يا مسافاتي
الدرب موحش ولاني قادر آعبره
ماتدري الناس وش تخفي كتاباتي
لكنْ تفضح شعوري حدّة النبره
رماني الحلم من كثر انكساراتي
وانا انتمي له واعيشه صدق واعتبره
انسان مخلص يمثل لي طموحاتي
واليوم دامه تركني شنهي الدبره
حبيبتي قربي لي واسمعي ذاتي
ماجيت امثّل على شعري او اختبره
مشكلتي اني حزين وطوّل سكاتي
والشاعر إليا حزن ما يسعفه حبره
قولي لهم لو يطول غيابه بياتي
وشوفوا مكانه بعد ما غاب وش كبره
كبير وادري يضيعون بمساحاتي
واكثرهم اللي يحاول يكتسب خبره
إليا حضرت الشعر يسمو براياتي
اخطف قلوب البشر وعقولهم عبره
حتى ولو غبت عنه ماني محاتي
يبقى على خبري وأبقى على خبره
أضف تعليق