آراؤهم

وين مسطرة الشعب ؟!.

اكد رئيس مجلس الامة احمد السعدون سعيه لحل قضية نجم المنتخب الوطني بدر المطوع ومحاولة تذليل الصعاب لعودته الي عمله السابق في الحرس الوطني .
قال الرجل : ماهي غريبه علي ابو عبد العزيز بس  شنهي السالفه لان امس ماجيتكم .
قال المعاق : السالفه مو من امس إلا لها حوالي سنه .. وهي جت علي خلفية احترافه معارا لنادي النصر السعودي .. دوامه وجه له عدت انذارات يطالبونه بسرعة العوده لعمله بالحرس الوطني وهو معطيهم طاف من قلب لين فنشوه .
قال الشاب : جزاه الله خير لان هالاعب هو النجم الاوحد بسماء الكرة الكويتية .. واللي مثله يكرم مو يفنشونه يعني (الطقه) ما جت إلا براس هالمسكين .. يعني ماكو بهالبلد إلا هالولد اللي غايب .. واللي مو مصدق يشوفنا وحنا متجمعين هالضحي علي القهوه ونسولف و(نتعلل) جن ماورانا دوامات .
قال الخبير : يا اخونا عاوز ضرب نار وترحيب حار عالكلام ده الله واكبر السلام عليكم ورحمة الله وبركاته صباح الخير ياباشا .. افهم من كلامك انك شربت قهوه عند ابو احمد بالجرنال خلال اليومين دول .. ياسبحان الله نفس الاسطوانه عمال ترددوها  بخصوص قعدة الضحي (العود) واشمعني وطب ليه قبل الظهر .. الباين انكو حكومة وحنا مش عارفين ! .
قال الشاب : ههههه هو قايلك نفس الكلام محور حديثنا اليوم .. السالفه الظاهر فيها توارد خواطر مو اكثر ! .
قال الشايب : وحنا وش مصلحتنا من توارد الخواطر وفناجيل القهوه الوسط واللي علي الريحه .. خلونا نرجع لسالفة رئيس مجلس الامه مع اللاعب .. امووت (بعيد الشر عني) واعرف سعادة الريس وينه عن مشاكل عياله الباقين ؟ .
قال الرجل : افا (بلشت) بالحسد والغيره .. الله يعين لو مو امنت شايب وشراح تقول ؟ .
قال الشايب : راح اقول نفس الكلام وكلامي مو ضد اللاعب او ضد مصلحة الرياضة بالكويت .. كان من المفروض انه يتحقق وراء الموضوع ويعرف منهو اللي وراء توريطت هالاعب ..  وبعدين الريس وبقية اعضاء المجلس وينهم بقية العاطلين والناس المظلومه برواتبها والمتقاعدين وازمة السكن وغلاء الاسعار .. مو من المفروض ان المواطنين كلهم بمسطره وحده ؟ .
قال الرجل : والله الحجي عنده حق البلد مليان مشاكل .. وهو صاج خلو كل هالمشاكل اللي ماتشيلها البعارين ومسكوا بمشكله صغيره لفرد واحد .. ايييه والله وينهم من قبول الكليات العسكرية اشوف اهل النسب (تفنقرت) بالشارع كل واحد اخذ منهم صابونه لكس معطره ودته لرقيب باحدي هالكليات العسكريه وغيره اللي للاسف يغشون منهم يوم الامتحانات دخلوا ضباط لان اهلهم اللي ضابط او عضو او من اكابر البلد اللي مرضي عنهم .. تدرون اشلون راح اسكت لان القلب مليان .
قال الخبير : حرام اللي بيحصل ده ببلدكم افهم من كلامكو انكو عاوزين ان الدفاتر تتفتح لعمل تحقيق بالمواضيع دي .
قال الشايب : ونبي اكثر لان عيالنا مظلومه ببلدهم وشي يقهر اللي قاعد يصير الواحد طول ما ولده يدرس يدفع فلوس علشان يخليه من المتفوقين وبالاخير يجي واحد عنده (واو) كبيره يدخل وعيالنا تضيع لا جامعه مثل الناس ولا هم محصلين وظايف من طول الطابور .. والله حاله ماتقولون شنهو نسوي علشان نعجب ببلدنا ؟! .
قال المتمولس : اليوم هو الخميس …… ارسلها ل 10 اشخاص وسيكون غدا هو يوم الجمعه ! .. واياك ان تهملها فقد اهملها .

 شخص صحي لقي نفسه في يوم الاحد ، .. وعند ضحك الجميع رفع علي مسامعنا الشيخ زعلول اذان الظهر .

bojwees1@hotmail.com

 

Copy link