علي غرار (ياعيني علي غرار) دخلت سعد الفرج الثانية بلوحة المقهي الشعبي بمسرحية حامي الديار .. دخل الرجل بس مو لابس بشت للديوانية وطلب من جبار قصدي بابو .. بابو فر الجاي والقهوه علي الربع .. وبعد البسبسه من قبل الحضور قال اليوم جايب لكم سالفه ماقط خطرت علي بالكم انشاالله تعجبكم .. انا جايكم من مختار المنطقه يقولون اليوم هو اخر يوم بالتسجيل للقيود الانتخابية للي ما سجلوا من قبل وخصوصا المتقاعدين من العسكريين والشباب اللي بلغوا سن الرشد .
قال الخبير : ايه هو الجديد بالموضوع ؟.. ماكل سنه بقرأ الخبر بالجرنال واسمعه علي القناة الاولي بعد العشا .. هههه لغاية ماحفظت المواعيد .. ياعم الحج الناس دي تفتح باب التسجيل من اول فبراير لغاية العشرين من شهر مارس . يعني مافيش جديد ! .
قال الشاب : ههههه اهب يالخبير صج انك خبير .. الله ياهي من (رزاله) مراجعة المختارية اول مايشوفون وجهك علي طول يقولون روح صور البطاقة المدنية والجنسية وتعال .. وعقب ما تصور بمكان (حذفة عصا) تصف دور وقافي عقبها يسجلونك بعد مايوقعونك علي الاستماره ومن ثما يسلمونك الايصال ! .. وقبل لاتعطيهم مقفاك العريض تقولهم خلاص يقولون لك خلاص .
قال المعاق : والله حاله هم لليوم متمسكين بهالطريقة البدائية ورق وصور وكتابة وتوقيع الناس تعدت القمر لنبتون وربعنا للحين عايشين بعصر الورق وبل الاصبع والتخلف وين راح الكمبيوتر وعصر الانترنت هم وين عايشين والله حاله .
قال الشايب : مايبيلها سؤال (يالبناخي) عايشين بالكويت صل عالنبي اللي تكدس الاجهزة من غير سنع .. حنا وين نتطور والمسائيل فكرها رجعي مع ان الامور اسهل من السهاله وماهي محتاجه شي ! .. بس وشنقول حنا شعب نعشق البهدله وروح وتعال وابوس خشمك وفوت علينا بكره وعقبه وان كان مو عاجبك تعال بعد اسبوع .. واياني وياك و(البرطمه) تري اقلع مداك شهر !.
قال الرجل : لو ما عليك امر ياحجي شنهي السهاله اللي انت شايفها وهم ماهم شايفينها هالطواقم الحكومية ؟
قال الشايب : يابوك انتم تذكرون قبل كم سنه .. يوم اقروا حق المرأة بالتصويت ؟
قال الشاب : ايييه كان قرار حضاري ونقلة نوعية لعالم المساواة بين الرجل واخته المرأة ! .. وشفيه القرار عسي مو عاجبك؟.
قال الشايب : عاجب واللا مو عاجب هذا مو موضوعنا .. موضوعنا هو تسجيل القيود الانتخابية عندكم خبر ان التسجيل تم من غير ما تراجع ولا حرمه اي مختارية بالكويت ! .. كل اللي عملوه الحكومة هو تسجيلها من خلال سجلات البطاقة المدنية بلا مراجعات ولا دوخة راس لانهم مشتهين تخليص الموضوع .. وبهذي الطريق تسهلت الامور هم لو تاركينها لنظامهم العقيم صفي دور جان مانخلص إلا بعد عشر سنين ونيف ! .. شفتوا ان الامور طيبه بس فيه من يصعبها صج بلد (تخولف) ! .
قال الخبير : اللهم صلي علي حضرة النبي صدق من قال الدهن بالعتاقي ربنا يفتح عليك ياحج ! .. والله انت محسسني انك بتتعاطي حاجه ممكن (باور هورس) واللا (ديو) مثلا .. قال الشايب : لا وانت الصاج حليب خلفات .. وعند ضحك اهل الديوانية قال المتمولس : عدل عدل ياقامووس اكسفورد الكويتي .. وعندها رفع علي مسامعنا الشيخ زغلول اذان الظهر .
أضف تعليق