آراؤهم

نشكر الحكومة على التنمية الرائعة !

“الله يكون بعونك يامواطن كل يوم والثاني كارثة بيئية تحاصرك بمنزلك يعني مو كافي الغبار والحر والرطوبة وشجرة الكينكابرس حتي النفط هالنعمة صارت نقمة علينا كل كم سنة ينفجر و مافتنه نشمها” قالها الرجل .
 
قال الشايب :”احمدو واشكروا الله انتم بخير ونعمة يا اهل الجهراء ماعندكم شي من اثار النفط … هي حوادث متباعدة كل كم سنة تجينا مرة … الله يعين اهل المنطقة العاشرة قصدي الاحمدي ومجاورها, كل يوم والثاني ريحة الغاز محاوطتهم وباليوم اللي مايشمونها البعض منهم يفترون حوالين سياراتهم وهي مشتغلة يشمون ريحة عوادمها”.
 
قال الشاب : “وين استقالة المسؤولين بالنفط اشوف عمك اصمخ … اشوف كل واحد قاعد بكرسيه متحضنه مو هاده … اييه الله يمسيك بالخير ياوزير النفط السابق عادل الصبيح لو اني ماخذ على خاطري منه بخصوص قسايم سعد العبدالله بس ابن الحلال تشجع وسواها متحملا المسؤولية قبل عشر سنين ونص بالضبط”.
 
قال المعاق :”ايييه الى متى غايبه سلامة المنشآت ? ووين نتائج لجان التحقيق السابقة ? او ان السالفة تنفيع في تنفيع لسين وجيم من الناس على حسابنا, والله الظاهر ان السلامه هي اخر اهتمامات شركة النفط وخير دليل هو كثرة التسريبات والحوادث, ياناس ياعالم ياحكومة الى متى وانتم ساكتين اللي صار كارثة بيئية على كل شيء حي بالكويت وحتى البحر ماسلم منها هو وكائناته خلونا حنا حنا محنا بالحسبان , هو لو فيه محاسبة للمتسبب جان ماهذا حالنا, معقولة التسرب صاير الظهر والمسائيل تجيك تتسحب العشاء وقبل منتصف الليل يتخذون قرراتهم?”
 
قال الخبير :”بعد بحث وتقص وقراءة بالصحف والمجلات … وبرضه من خلال السمع من اجهزة التلفاز والراديون سمعتهم بيقولوا ان الغاز المتسرب ده من النوع الثقيل اللي ارتفاعه عن الارض حوالي متر (مش ثقيل) وان شركة النفط بحسب تصريحات ناس واصله انها لاتملك خطة طوارئ وتدابير لمواجهة الكوارث ومنع انتشار الغازات السامة في الكويت طول عمر تاسيسها اللي عمره 75 عاما وضف الى ذلك بيقولوا والعهدة على الرواة ان بعض الناس اللي بالنفط كل همهم الصراع على الكراسي ! وبرضه شامين ريحة تلاعب ببعض العقود واشاروا الي انهم قد طلبوا من الحكومة مرارا وتكرارا التدخل لوقف التجاوزات لان لها ابعادا اقتصادية على ثروة البلد وبرضه الحكومة ما استجابت وبدي الحق معاها هي الحكومة تشوف ايه واللا ايه كل سنة حكومة جديدة. 
 
قال المتمولس : “رواتب عالية وعلاج مجاني باحسن المستشفيات وسيارات ببلاش وفوق كل هذا طالبين خبير اميركي ساعته بخمس الاف لييييش هههه هالحين عرفت ليش جارنا اول ما ينزل جهاز جديد بالسوق يشتريه .. اثاري شغلهم هيصه … وعند ضحك الجميع على فصلة المتمولس رفع على مسامعنا الشيخ زغلول اذان الظهر .
Copy link