فيه أحد يسمع ألوووو؟!
بقلم.. محمد خلف الشمري
اليوم عزيزئ القارئ يوم جديد ولهذا حتما وجزما تكون مقالتي مختلفة لانها فيها افكار واقتراحات متنوعة ياليت يستفاد منها .. وبالاخص اتحاد الكرة المسئول الاول عن اللعبة الشعبية الاولي .. يقولك والعهدة علي الراوي وهي صحفنا المحلية التي نشرت قبل كم ان الشقيقة قطر قررت علي لسان رئيس الاتحاد القطري لكرة القدم زيادة عدد اندية دوري نجوم قطر لكرة القدم بدءا من الموسم المقبل الى 14 ناديا بدلا عن 12 وهو مايعني انه تم الغاء الهبوط الي الدرجة الثانية .. واشار الى ان الدراسات اكدت ان زيادة عدد فرق دوري النجوم ستكون مفيدة لكرة القدم القطرية في المستقبل ولأجل ذلك كان لا بد من زيادتها .. كذلك اعلن عن دمج دوري الرديف ودوري اندية الدرجة الثانية تحت مسمى جديد على ان يضم 18 ناديا وهو العدد الاجمالي لاندية قطر .. ومن هذا المنطلق ومن خلال هالفكرة القطرية تولدت فكرة براس العبدلله وفحواها ليش لا ليش مانطبق هالفكرة عندنا بالكويت لان الحال من بعضه دام الاندية عددها قليل .. وفكرتي هي بكل بساطه وبدون تفلسف هي خلونا نرفع عدد فرق الدوري الممتاز الي 12 فريق بدلا من دمج كل الفرق بدوري واحد بحيث يصعد الاول والثاني من الدرجة الاولي مع بقاء صاحبي المركزين السابع والثامن من الممتاز .. هههه ادري فيكم راح تقولون هالعدد صار عشره وانت قمت تخربط علينا وين 12 اللي تقول عنهم .. الصبر يابن ادم يقولون لو صبر القاتل علي المقتول انقتل لوحده جايك بالكلام .. الفريقين الباقيين يتحددون عند بداية الدوري بحيث تلعب الفرق الاربعة المتبقية دوري من مرة واحده يتاهل منها الاول والثاني للممتاز .. ومن خلال هذا المقترح نكون ضمنا ان لاعبي فرق دوري الممتاز يكونون لعبوا 33 مباراة من خلال ثلاث اقسام وهذا هو المطلوب اسيويا بحسب تاكيدات الرئيس الجديد للاتحاد الاسيوي الذي سيعتمد مشاركة الاندية الكويتية في دوري ابطال اسيا .. هاااه وشرايكم بهالفكرة ؟ .. اكيد ماتخرش الميه؟! .. وان خرت دقو الشماسي دقو دقو هههه فصله .. اييه قبل ما انسي الفريقين المتبقيين من انديتنا الاربعطعش اللي ماصارلهم نصيب بالدوري الممتاز يكونان هما نواة فرق الدرجة الاولي يضالف لهم فرق الاندية الرديفة لفرق دوري الممتاز بعد الغاء مسمي دوري الرديف وبهذي الطريقة صار عندنا 14 فريق درجة اولي .. وبالمره دامها افكار ببلاش دام محد يسمع نزيدهم فريق مختار من لاعبين الاندية للمراحل السنية يكون منتخبا اولمبيا يكتسب خبرة المنافسات من المشاركة بهذا الدوري .. وقبل لاتسالوني عن كيفية الصعود والهبوط راح اسبقكم واقولها الصعود والهبوط للدوري الممتاز تكون للفريقين المتبقيين من الدرجة الاولي سابقا وسلامتكم ولاتنسونا من خالص الدعوات الطيبة .
ألووو اخير : يآقلب فضفض على الصفحآت واكتب له أبيــات يمكن يجي صدفه ويقراها .. سيّل حروف الوله والشوق واسكب له من دلتك لين عينه ينتثر ماها .
أضف تعليق