أقلامهم

خالد الشلال: صندوق مفتاحه ضايع من زمان يوم كنا أطفال هذا الصندوق هو صندوق الاجيال القادمة.

S.O.S 
الأثرياء يزيدون ثراء والفقراء…!!؟؟؟
د.خالد أحمد الشلال
الاثرياء يزيدون ثراء والفقراء يزيدون فقرا والمتوسطون يزيدون ضغطا وحسرة وعسرة هذا ما قاله صندوق النقد الدولي. السؤال هل هذا الكلام او النتيجة تنطبق علينا بالكويت؟ الجواب يخاف الانسان يصرح فيه.بالنسبة للصناديق احنا اكثر ناس عندنا صناديق ولكن صندوقين منهم المفاتيح عند اخوانا في الدول النامية او في طريقها للنمو او الدول النايمة عن التنمية واهي معتمدة على صناديقنا، الصندوقين هم الصندوق العربي للتنمية والصندوق الكويتي للتنمية وهذي كلمة التنمية شفهي بس بالصناديق الصحيحة.عندنا صندوق مفتاحه ضايع من زمان يوم كنا أطفال هذا الصندوق هو صندوق الاجيال القادمة احنا كنا اجيال قادمة وما شفنا شي حتى كشف حساب ما نشوف ولا جم فيه فلوس ولا تقرير ديوان المحاسبة هذا صندوق عجوز ماينفتح ومغطى بسجادة صلاة الحجية وفوقه سلة ملابسها ورادو بني عليه جلد بني ومسكته جلد مقطوعة رازا شغلته تطلع محطة وحدة. عندنا بعد صندوق المتعثرين أو المعسرين ومكتوب عليه ان مع العسر يسرا ومكتوب عليه الصبر مفتاح الفرج ويا صبر ايوب على بلواه واصبروا وصابروا ومكتوب عليه ان الله مع الصابرين. عندنا بعد صندوق اعانة المرضى الله يعطيهم العافية وتمت سرقة مليون دينار من الصندوق اقل تكلفة فتحة الجابرية بقليل، عندنا عند المحاسب الجمعية علبة مكتوب عليها من يمسح دمعة هذا المسكين انزين من يمسح دموع المساكين اللي عندنا اللي يخلص راتبهم أول اسبوع من الشهر، عندنا صندوق المسرحين بس بدون شاوي.عموما اتمنى من مجلس الامة النظر في جدول الرواتب وطلب زيادة للمواطنين اللي ينطبق عليهم من يمسح دمعة هذا المسكين.الله يوفق الجميع ومع السلامة.
الدكتور خالد أحمد الشلال
Kalshalal@gmail.com
Copy link