الموق بذّنّه كثير الهواجيس
شيٍ ثقيل وشي بالحيل قاسي
مرات كنه فوق حمر المحاميس
ومرات كنه فوق حمر الطعاسي
ياكبرهن لاطعت وسواسة ابليس
وياصغرهن لاطعت ربّ الرواسي
ضايع ولا لي في كتابي قواميس
ضيعة طفل في عام الاول دراسي
باسي ضعيف وحيلتي فالقراطيس
وانا الذي قد قلت يا قوّ باسي
ونومي على كوعي وكلّه كوابيس
وليا صحيت العين شافت مآسي
ما كنها الا عين ظلم المحابيس
يوم ابحرت في يم مابه مراسي
في ظلمتن ما نورتها فوانيس
واليم موجه مستلج الحساسي
يمٍ عظيم الموج كله تظاريس
مافيه صمت ولا سكون امتواسي
رعب الهموم اللي عليها مقابيس
إحتلّن المحجر بوقتن قياسي
صارن كما صكة حديد المتاريس
من حول بابن فيه قصرن رياسي
بابن يحوفونه خبيث الجواسيس
يبغون هتك العين من دون ياسي
ياهم جبت الغم وحظ المتاعيس
في وسط عيني تدّهر في حماسي
خليت كل افراح عيني معابيس
مسكينتن ماحوشت من يواسي
يهني من عينه بليدة احاسيس
يهنا منامه وان صحى قام ناسي
ماذاق موقه مرّ هم العواسيس
دايم عيونه تستلذ النعاسي
والله لو ماقدّس الدين تقديس
بيدي لحط العين من تحت فاسي
يالله تكفيني شرور الوساويس
اللي عمت عيني بعد شاب راسي
ويالله كان اني على خير تاسيس
عجّل شراب الحق في وسط كاسي
أضف تعليق