اجلح : حبيبي املح من غير (احم بلا دستور ولا قضايا عالقه ) يالله أنا داخل بإصبع رجلي اليمني الكبير .. بلا تمهيد ولا فرش أرضيات وبلا سجاجيد حمراء وكل هذا من ميانتي عليك .. عارف سالفة عاقب الرعيان سارح ؟.
املح : عارفها من يوم أنا (بزر) كل يوم والثاني الشيبان عندنا بالديوانية يقولونه لين حفظته صم لو بغيت اسميك أبطال هالسالفة اسميهم من البطل لين الكومبارس! .. بس وشجاب طاريه ؟
اجلح : ابد الموضوع وما فيه تذكرت هالسالفة وأنا أتابع البطولة العربية التاسعة اللي ينضمها الاتحاد العربي لكرة القدم بالسعودية بمدينتي الطايف وجده هاليومين .
املح : جهد مشكور للاتحاد العربي ويا ليت بطولاتهم تستمر كل سنه مو بالقطعة علشان الكرة العربية تتطور وقبل كل شي أنت ناسي أن من خلال هالبطولات تتوثق الصداقات بين الشباب العربي وتتطور مستوياتهم من خلال المنافسات .
اجلح : هههه وين راح بالك بعيد يا بو الصداقة وصلت الرحم وتطور بالمستوي .. يبه انا اقصد موعد البطولة مو مناسب بالمرة وخصوصا أنها تتزامن من بطولة أمم أوربا .
املح : اترك عنك أوربا وهالمزايين اللي نشوفها كل ليلة .. أنت ببطنك (بلا) والسالفة مو سالفة تزامن وقتها مع بطولة أمم أوربا و(خشوفها) .. لأنك سيد العارفين يا اجلح ماكو تعارض بالأوقات والمشتهي يتابع يتابع اترك عنك هالسالفة قول وش عندك ؟ .
اجلح : ههههه والله محد فاهمني كثرك يبه الاتحاد العربي ضاقت عليه الأوقات ؟ .. مالقو إلا هالوقت بالذات من السنة يعني ما حلت البطولة إلا بعد نهاية الموسم الرياضي العربي وبهالجو الحار اللي يطلع الواحد من ملابسه ؟
املح : ايييه فهمت أنت صرت مثل اللي مالقو بالورد عيب قالو عنه يا احمر الخدين .. حبيب قلبي البطولة تقام بالطايف والطايف جوها أخر روعة .. اخ لو بس لاغين جدول مباريات جده وخلينها بالطايف جان الأمور كملت .. لعلمك يالشريك ان هالبطولة أحسن استعداد للدول اللي تعد منتخباتها الرديفه او السنية او الاولمبية .. هههههه بس بس بس انا عرفت سر اعتراضك كله من هزيمة منتخب الكويت الأول أمام رديف السعودية بنتيجة ساحقة ماحقة ما جت ببال احد .. يابن الحلال وجه سهام ونبابيط ومسدسات نقدك لا اتحاد الكرة الكويتي اللي حط منتخبه بهذا الموقف المحرج بدل ما يهيئ فريق جديد راح بفريقة الأول المنهك المتعب اللي ما فيهم حيل من كثرت المشاركات مو للاتحاد العربي يابو الفهاميه .
اجلح : الضرب بالميت حرام .. ولله الحمد ما راح أصير لا أنا ولا أنت مثل اللي يقولون قلنا وزدنا وعدنا وحذرنا واستبقنا وعد رجالك وأورد الماء .. لان الأمور عندنا واضحة وضوح الشمس .. أما بخصوص الاتحاد العربي فأنا اشد علي يده واهنيهم برجوع البطولات العربية بس يا ليت يختارون مواعيد مناسبة علشان الفايدة تعم الدول العربية ويلتم شمل العرب رياضيا .. وقبل لا انهي حديثي تري اللي عاقب الرعيان سارح هو اتحاد الكرة عندنا .
املح : ايييه يا اجلح هذا الكلام السنع اللي ما يخرش الميه ومنا إلى اتحاد الكرة الكويتي يا ليت يراجعون حساباتهم شوي ويتعلمون من بعض الدول العربية المشاركة بهالبطولة علشان صالح كرتنا المحلية وسلامتكم .
ألووو اخير : الورد عندما يذبل لا يعود للحياة مهما قمت برشة بالماء .. فقط يبتل دقائق وسرعان ما يعاود جفافه .. تماما كثقتنا عندما نفقدها بأناس خذلونا بتصرفاتهم .
[email protected]
أضف تعليق