رفع الشاب عيونه من الجريده اللي بين يدينه ثم قال البشاره ياحجي شايب واخيرا صار الاهتمام فيكم على مستوى الدولة ! .
قال الرجل : يستاهلون كبار السن زين زين لله الحمد اخرت الصبر فرج ،ناصر بس يابو الشباب شنهو الموضوع ؟ .
قال الشاب : وزير الصحة الله يجزاه خير قبل كم يوم اطلع مجلس الوزراء على البرنامج الوطني لرعاية كبار السن اللي اعمارهم فوق 65 واليوم لله الحمد والمنة اول قرارات هالبرنامج طلعت باصدار بطاقات الاولوية لهم .
قال الخبير : اللهم زيد وبارك اهي البلد اللي الواحد يتمني يعيش فيها .. مش كفاية رعاية المعاقين واليوم اضافوا ليهم رعاية كبار السن ايه الهنا ده والله لو لم اكن مصريا لوددت ان اكون كويتيا .. اللهم لاحسد لحسن تقولوا الخبير بيحسدنا .
قال المعاق : الله يجزاهم خير وهذي (الهقوه) ببلدنا بس من قال ان المعاق ياخذ حقوقه كاملة ، ياعمامي المعاقين تصنفوا الة صنفين الشديده والمتوسطه دربهم خضر بكل المعاملات واما راعي البسيطه فحطوله الف حجه وحجه كل شي ماينطبق عليه جنه مو معاق .. تدرون خلوني ساكت لان الواحد مقهور علي الاخر واخاف ألخبط بالكلام واغيب شمسكم .. من الاخر موضوع اليوم يخص عمي الشايب وراح اعطيه المايك .
قال الشايب : مشكور ولدي المعاق والله يفرج كربتك وكربة كل واحد مبلي ..هههههه بطاقة الاولوية وشراح اسوي فيها اهل المنطقة ماهم مقصرين اول مايشوفوني بالمستوصف او بالمستشفي من كيفهم وبلا طلب يعطوني الاولوية يعني هالميزة متمتع فيها ببركة عيال الكويت كافة من حريم ورجال .. لووول (حلووه طالعه من شايب ) والله ما ادري وشراح تفيدني فيه هم لو صاجين فكروا بافكار غير اولوية البطاقة ؟ .. انا ادري انكم تبون تعرفون اللي بنفسي حاضر راح اقوله لكم ! .. ياعيالي مرات الواحد منا حنا ياكبار السن يحتاج للذهاب للمستوصف وصحته ورجليه ماتساعده ! !!! .. ابسطها لكم انا وش لي ببطاقة دور وانا عاجز من الذهاب للمستوصف يعني وشراح تفيدني فيه .. مكان من الاجدر توفير دكاتره تحت الطلب للمحتاجين (وعددنا مو كثير) علي الاقل يرحمونا من جيبت هالدكاتره الخصوصيين اللي جزاهم الله خير طيروا اللي بجيوبنا من غلاهم .. ياسعادة الوزير افكارك طيبه وحلووه ونيره بس ! .. حنا يابوك بحاجة دكاتره تجينا لبيوتنا لان اغلب الاحيان تحوشنا ام الركب مانقدر نتحرك من فرشنا .. وازيدك من الشعر بيت مو كل واحد يقدر يجيب دكتور خاص ولهذا انا فداء ذا اللحية انك تدرس هالمقترح لان فيه شي احق من البطاقة والله يجعل اللي تسويه بميزان اعمالك .
قال المتمولس : زنود الست .. شعر بنات .. ام علي .. ياربي ليش كل الحلويات باسم البنات .. كم انت مظلوم ايها الشباب ههههه .. تري مافيها شي لو يسمون اي شي باسم الشباب مثل كوع ساير اصبع احمد عبدالرحيم او سكسوكة مشاري .. وعند ضحك الجميع فصلت المتمولس رفع على مسامعنا الشيخ زغلول اذان الظهر .
أضف تعليق