آراؤهم

“وزراء سوبر ديلوكس”!

قال الشايب: “الصحة من حطو لها وزير” .
 الرجل: بالإضافة إلى عمله وزير مالية.
 الشايب: “الصحة همومها كثيرة وتبي لها وزير متفرغ يدير باله عليها لانها هي ام المشاكل” . الشاب : “وشحقه وزير متخصص انتم ناسين ان الوزراء يالله من فضلك سوبرات خارقة فوق العادة أنتم ناسين ان الوحدة بالكويت عن عشر… و هالكلام مؤشر حقيقي ان الرجل بالكويت “غرندايزر” و”سبايدر مان” شنهو الوحدة والعشرة هو فوق المستوي.
 المعاق: قوية بس عاد هذا العرف بالكويت من سنوات لازم بالحكومة وزير بوزارتين .
 قال الخبير: تصدقوا من غير حلفان ان الوضع ده بس عندكو بالكويت الوزير زي العم وحيد ذراعته ورجليه بتطول وبتقصر زي ماهو عاوز اييه ده! 
 قال الشايب: الظاهر انهم مايعرفون ولا سمعوا بالمثل اللي يقول ان راعي البالين ينقصه واجد . الرجل : وليش ماتقول المثل عدل شنهو ينقصه واجد قول كذاب وخلص نفسك من اللف والدوران , الشايب : وانت صاج بس الواحد بالكويت هاليومين قام يخاف لايلصقون فيه تهمة .. يابوك الحرص المطلوب وجسمي ماهو مثل اول يتحمل بهدلة السجن واكسر الجبل.
 الخبير: اييه مالك ياحج جبل ايه الله برضه ده كلام انت بالكويت مش بفيلم لفريد شوقي ورشدي اباظه .. ده السجن للجدعان اللي زي حضرتك.
 الشايب: وش جدعانه وثناياه هذا سجن مو لعب باستاد ارضيته ثيل حدايق .
 الرجل: وانتم وش حارق خبزكم .. الوزارة ماهي مطولة لانها موقتة وكلها كم يوم وننتخب وتستقيل وتتشكل من جديد بشكل احسن وارتب , الشاب : الله يسمع منك بس ابوطبيع مايخلي طبعه لازم يكون عندنا بالحكومة وزير سوبر… يا اخي استغرب من هذا الوضع البلد مليان كفاءة بدل الواحد الف والفين بس ماني عارف سر هالنظرة الضيقة اللي تدور على كم واحد.
 المعاق: الاصابع ماهي سواء واللي تعرفه احسن من اللي ماتعرفه… هم وش لهم لهم بعوار الراس مع ناس جديدة .
 الخبير: يعني على رأي المثل الشعبي اللي بيقول …
 قال المتمولس : يابخت من وفق راسين بالحلال ..
 الخبير: ايه ده بيقول ايه المتمولس .
 قال الرجل: المتمولس صاج يابخت من وفق راسين بالحلال .. انت الظاهر تبينا نشرف التخشيبه ام سين وجيم وليش وكليش.. وعندما ضحك الجميع رفع على مسامعنا الشيخ زغلول اذان الظهر.
محمد خلف الشمري
bofahad42@hotmail.com
Copy link