آراؤهم

صرخة معاق.. من يسمعها!

يا دافع البلاء، وراكم قاطعين، اللهم ياكافي ماتسألون ليش هالغيبة.. معذورون يالطربا، قالها المعاق ثم داس على دواسة الكلام اللي بحلقه وأضاف: اليوم أنا جايب لكم علم من مراجعة هدت حيلي وأخذت مني يومين فرفرة بمناطق الكويت.
قال الشايب: مدامك جاي من مراجعة بركة اللي خلصت بيومين مو اكثر!
قال الرجل: يابن الحلال هالمسكين من فضل الله ومن ثم فضل بطاقة الإعاقة معاملاته ماتطول علي طول تخلص من أول مايدخل باب أي إدارة .
قال الشاب: مدامك جذي (ماستر كي) ممكن يالحبيب أستعيرك أنت وبطاقتك يوم بمراجعة دابله جبدي من طول الممشي اللي فيها .. الواحد يوقف سيارته بعيد وعلي مايوصل لهم يكون منهد حيله .. وسكبته خربت!
قال الخبير: صلواعالنبي يااخونا سيبو الراجل يكمل .. ياباي ايه الحسد والقر ده.. انتم بصراحة حاجه (اوفر) .. لالا بجد.
قال المعاق: الله كريم وشكرا لك ياخبيرنا علي هالدفاع المستميت فكرتنا بالاستماته اللي متبعتها بعض قنواتنا الفضائية عن ناس دون ناس.. عفوا يا اخواني كلامكم الظاهر انه مثل ما قال الخبير جاء بمقتل .. اللهم ياكافي عيونكم رصاص مستجلي يكسر صليب العظاما وللاسف رحت اراجع ادارة الهجرة اللي بمنطقتنا علشان اضيف سايق قدمة لهم شهادة الاعاقة علشان يعفوني من رسوم الاضافة .. قال الموظف المسئول روح للحكومة مول اللتي تقع علي بعد كيلو واحد مالك سنع عندنا .. طلعت منهم وعلي طول رحت للحكومة مول وين وين علي مالقيت موقف .. المهم دخلت علي المسئول وقلت له اللي حصل لقيت ابواب منصكه قال عود يالنشادي معاملتك ماشفنا لها جرة روح راجع خدمة نادي المعاقين اللي بحولي .. قلت ماكو اقرب قال هم المكان الوحيد اللي يسنع معاملتك .. قلت له تكفي ابي ادفع رسوم وافتك من المراجعة .. قال الموضوع طلع من يدي وحرام تدفع روح راجعهم .. ماطولها عليكم رحت عقب ما انهد حيلي من الزحمه والتي تخللها فواصل من السباب لزوم الزحمة مثل ما انتم عارفين .. دخلت عليهم وماقصروا سنعوا معاملتي وقبل ما اروح قلت خل اعدي علي الضابط واسأله عن مكان اخلص فيه معاملتي لان حرام اجي من الجهراء .. قال ليش ما تخلصها بالادارة اللي عندكم او المول .. قلت قالولي مالك سنع عندنا .. قال عندهم مخلصك لان حنا قبل ايام المدير العام حط اول السنه الجديدة اخر حد لانجاز المعاقين بكل الاداراة لراحتهم .. قلت يمكن المواصلات تاخرت عليهم وحنا للحين تونا بنص يناير يبيلهم شهر لشهرين علي مايستوعبون هالكلام طلعت منه وانا اتشكر منه لحد ماوصلت سيارتي .. وهاااه للحين تبوني اروح معاكم !
قال الشايب : الله يكون بعونك وحقك علينا لان مايصير حنا والداخلية عليك .. ومنا الي اهل الوزارة بسرعة تفعيل قوانين المعاقين لان مو معقوله حاكرينهم بمكان واحد بالكويت وين التسهيلات اللي تقولون عنها ؟ .
قال الخبير: باشا نما الي علمي ان قانون المعاقين ما تفعلش لسا .. وكل اللي نسمعه كلام جرايد مستهلك من اعداد سابقة ياريت يتم النظر بقانون المعاقين من اعلي سلطه لتفعيله بجد مش بالكلام .
قال المتمولس: ياريت الوزارات يطبقون هالمقولة وانا متاكد ان الامور راح تمشي مثل الساعة ” لاتشرب ألماء وراء أكل السمك؛ لأن السمك يعيشً علي الماااء فربماااا يحيا ويلبط في بطنك ” وعند ضحك الجميع رفع علي مسامعنا الشيخ زعلول اذان الظهر.

محمد خلف الشمري
bojwees1@hotmail.com
Copy link