ألف شكر على التمر يا حكومة!
مفرج الدوسري
مشكورين على التمر يا حكومة، ما قصرتوا، رايتكم بيضا، وبيض الله وجيهكم، بس بودنا لو ما تكتفون (بالقدوع)! نبي فنجال وحديث رجال، والتمر بدون فنجال اشقر في دلة صفرا ما له طعم، نبي وزير التجارة يصرف لنا مع التمر قهوة وهيل ومسمار، لان القهوة والهيل اسعارها غالية، ونبي دلال وفناجيل، وليف للدلال وبيز! ونبي مدخن وعود ازرق نطيب فيه الرجاجيل قبل يمشون، ونبي فحم ودوه نحط عليها الدلال، ولا تنسون الملقاط، ونبي غواري وبيالات، وشاي وسكر وزعفران، ونبي سمن واقط! والغنم غالية، والضيفان واجد، نبي تفتحون لنا صفاة غنم جنب افرع التموين، وتخصصون لكل رب اسرة اربع ذبائح كل شهر، وقعود وعشر ذبائح لكل شيخ قبيلة، وتسلمون!! الدلة يا سعيدان لعمك الوزير؟
???
والله مصيبة، عيون الامة على الانجازات الكبيرة وتنطر تنفيذ خطة التنمية وتاليتها زيادة على التموين (تمر) الله يديم النعمة، شي يضيق الخلق، ما قدروا يبنون مستشفيات قالوا عطوهم تمر، ما قدروا يبنون جامعات قالوا بلوا حلوقهم بالتمر، ما قدروا يوظفون عيالنا قالوا سكنوهم بالتمر، هذي تاليتها، الانجاز تمر يا معالي الوزير؟ عموما نلتمس لكم العذر يا حكومة، ما دام عندكم وزير يترجى النواب علشان يستجوبونه، مشكلة!
???
يا معالي وزير التجارة، مشكور ما نبي تمر، نبيك تضبط الاسعار اللي مولعة ومنتفة جيب المواطن، نبيك تسوي حد للغلاء اللي ما له مبرر، نبيك توقف بعض التجار الجشعين وخصوصا الوافدين منهم عند حده، نبيك تسكر الشركات اللي تغير تواريخ صلاحية المواد الغذائية وتسمم الناس، نبيك تحول من يستورد اللحوم التالفة اللي تضر بصحة المواطن الى النيابة، نبيك تتشدد على الغرامات والعقوبات على من يستورد مواد مسرطنة تبيد الاطفال، يا معالي الوزير حتى حليب الاطفال والاغذية الخاصة فيهم ما سلمت من العبث بتاريخ الصلاحية، يا معالي الوزير واللي يرحم والديك ما نبي تمر، نبي حزم وعين حمرا في وجه اصحاب الشركات اللي يتاجرون بالاغذية الفاسدة، نبيك تحط يدك في يد وزير البلدية لانقاذ البلد من عصابات الدمار، ومشكور على التمر (شدعوه خلاص الحسا)!
< نقطة شديدة الوضوح
سمو رئيس الوزراء نوخذه ومخضرم وقادر على المواجهة والحزم لكن بعض بحريته ما ينشد فيهم الظهر؟!
أضف تعليق