آراؤهم

“آه يا أواعيي!”

“بقولكو ايه انت وهو وسع للجديد احنا شغلنا الجديد … اوعي يا حاج ده جديد مش تقليد وسع علشان قلبك مايعوركش … بيقولك بعض الاعلاميين بيباركوا لبعض على حصول الكويت على المركز الاول بحرية الصحافة, واضافوا كمان ان المركز الاول جاء تتويجا لديمقراطيتها “.
 
الشايب : “الف مبرووك للكويت واهلها المركز الاول بالحرية الصحافية … وهالامر نتيجة للديمقراطية اللي منتهجتها”.
الخبير : “اه وماله بس باين ان الجماعة ناسيين ان موريتانيا دولة عربية?”
المعاق : “الف مبرووك ونهدي هذا التفوق للكويت واهلها كلهم من كبير وصغير, بس وش جاب طاري موريتانيا وش دخلها بالموضوع ? ومن قال انها ماهي دولة عربية?”
الخبير : “الناس اللي بتبارك الظاهر ان حضراتهم ماعندهمش فكرة عن اسماء الدول العربية, من الاخير وباختصار  موريتانيا هي الاولى عربيا, والكويت ثانيا للعلم وتصحيح معلومات البعض”.
الرجل : “الف مبروك بس وين هالاعلاميين من مشاكل الشعب المتعددة … واللا كل همهم الترزز بالاعلام للتبريكات والتهاني, وناسيين مشاكل البلد والمواطن?”
الشاب : “لا اليوم صاحبنا جاي حامي لاسع والع مولع … فضفض واللي يرحم والديك لتحترق بنار الكبت والكبت هو الشي اللي حابسه راعيه بصدره, هذا للتوضيح علشان ماتفتكرون انه كبت الفلوس الشهير “.
الرجل : “نعم يا خوك القلب مليان آه صلوا على شفيعنا يوم الحساب, قبل فترة راجعت المستشفى وقال الطبيب ان عندي دوالي وحولني للمختصين اللي للاسف ماهم متوفرين الا بمستشفى مبارك ! بالموعد رحت للدكتور وطلب مني اجراء فحص للاوعية الدموية, ورحت للمختبر وعطوني اقرب مو بعد ثلاثة اشهر وبعد معاناة, جاء الموعد ولقيت اطنان من البشر بالدور كلهم مثل حالتي جلست جدام “كونتر” الاستقبال انتظر دوري حالي حال خلق الله بها المكان الضيق واحد يقوم والثاني يقعد لن حطينا جدول بينا ناس تريح وناس توقف … ومن خلال هالانتظار الطويل الممل سمعت محادثات الموظفات مع المرضى واحد مثلا عطوه اقرب موعد بشهر سبتمبر, وحنا بفبراير وواحد قالوا له وشرايك تاخذ موعد بشهر مارس العصر, وواحد اول ما جاء ما تسمع إلا الترحيب فيه هلا هلا وليش مطوف موعدك قال لهم كل ما جاء موعدي اكون مسافر ! قالوا الموعد الجديد متى تبيه? قال حطوه نفس موعد زيارتي الجاية للمستشفى بعد عشرة ايام وكل هذا وانا اسمع وصابر”.
الشاب : “عفيه عليك صبرت موعدك ثلاثة اشهر وناس وناس باقرب موعد”! 
المعاق : الخطأ خطاه من الاول ليش ما قال ابي موعد بالعصر ? لان حسب ما اعرف ان مراجعة الكويتيين العصر”.
الرجل : “انا وش دراني البطاقة المدنية بيدينهم, والله لو ادري جان قلت ابي العصر بس للاسف محد قالي, ولا عندي خبر من الاساس, وهم الله يهديهم الظاهر ان شكلي ماعجبهم”.
الشايب :” تعيش وتاخذ غيرها وبهدلتك هذي مثل ما شفت صارت محور حديثنا بالديوانية, ولهذا انا اقترح عليك انك تروح لهم وتشكرهم … يابن الحلال اللي قلته فيض من غيض هي جت على الدوالي ? يبه حنا لنا الله يا اهل المناطق والمحافظات الخارجية, وكل اللي اقوله اكلوا واحمدوا ربكم ان انتم عايشين مدام هالتفرقة بين المواطنين موجودة من لدن وزارة الصحة, لا وبعد يطلع لنا اعضاء بمجلس الامة يحاربون الواسطة بالعلاج بالخارج, هم لو عانوا مثل ما يعاني المواطن من اهمال صحي جان ما تكلموا … يا ناس يا قوم حنا مانبي شي غير الرعاية الصحية الطيبة وتوفير بعض الاجهزة الناقصة بالمستشفيات, وبالمرة نبي كم مستشفى جديد يخدمنا لان الكويت ممتدة من الاحمدي للجهراء ماهي بس منظقة الصباح الصحية, واااه يا اواعيي”.
المتمولس : شوكولاته .. شكلاته .. شوكلت .. شوكولاطه .. شكليطه .. شوكلط .. شقلاطه .. شوقولاطه .. شقليطه .. لا لا لا فعلا ان الاوان ان نجلس مع بعض ونتفق على كلمة واحدة. 
Copy link