رومانسية الغلا اللي راح يفتك بالمواطن

محمد خلف الشمري 

اليوم على غير العادة الخبير يضحك على كل سالفة وهذي عمره ما سواها حتى بنجحة الريس مرسي ما شفنا منه اي ابتسامة قالها الشايب ثم اضاف خير ياخبير عسي هالضحكات دووم وش اللي يضحكك اشركنا بموضوع هالضحات والابتسامات الشقاقية!.

قال الخبير: أبدًا ههههه ليلة امبارح الوليه ام حنفي اثابها الله قال ايه عاملة ليلة “بامبي” هههههه وردية ايه بليلتك الكحل وانا جاي مهدود الحيل من الشغل.

قال الشايب: واللي يرحم والديك عربي ياخبيرنا وش جاب سيرة اعزكم الله حفاظات بامبي, ويعني شنهو ليلة وردية؟ أول مرة اسمع ان الليالي لها اسماء.

قال الخبير: هههه راح بالك بعيد ياحج مش كل بامبي بامبي .. تعيش ياحج وتتعلم انت فين والليالي الوردية والحمراء فين سيبك انت مع قهوتك ربنا مايحرمكوش من بعض .. قال حفاظات بامبي بص ياحج الليلة الوردية هي ليلة النوم بالعسل .. والليلة اللي عاوزها الوليه “طربقتها” على دماغ اللي جابوها .. ربنا يهديها بعد ماخلصنا من  العشا اللي كان على ضوء الشموع شغلت “الريكوردر” بموسيقي هادية وقالت بينا يا “بعلي” نرقص, بهذي اللحظه ارتسمت على وجه الشايب ابتسامة وناسة واستغراب بنفس الوقت .. ضحك الخبير وقال فاهم ياحج كل معاني ابتسامتك بص للمره الثانية انا هعلمك اصول الرقص الرومانسي .. الرقصة ياحج الطرفين يحطو ايديهم اليمين وراء ظهور بعض والايد الشمال ماسكة باليد الشمال وتكون الحركة بكل خفه ودلع مرة شمال ونوبه يمين.

قال الشايب : ونااااسه هذي وينها عني يوم انا شباب ؟

قال المعاق : ههههه راحت عليك خل الرجال يكمل والله شوقنا بهالرومانسية, والله الواحد يستمتع بسوالف هالخبير الطيبة!، الله يلوم اللي يلومه على هالضحكة اللي مغيبة عيونه .

قال الخبير: ااخ لو تصبروا شوية اللي مفطسني من الضحك هو اللي حصل اثناء الرقص .. فبعد ان تم الالتحام  حسيت بهرشه مش وقتها بظهري قلت لها زي مابتقولوا “تكفين” حكي لي ظهري وهي عمال تهرش فيه وانا اقول فوق حبه تحت حبتين ! .. وبكدا ضاعت الليلة الرومانسية بالحك اعوذ بالله من الشيطان.

قال الرجل : الله يهنيك ويديم هالسعادة عليك وعلى كل مسلم  .. وهالحين بعد هالوناسة والضحك جاء دور الرومانسية المحلية بمباركة حكومية كالعادة وهالمرة جايبها لكم من شركة المواشي المورد الوحيد للخرفان الاسترالية اللي الله يهديهم بيوم وليلة ارفعت اسعار خرفانها من 24 دينارا الى 38 للمبرد و45 لذبح الكويت .. وعند الاستفسار من غلاء الاسعار قالوا الحكومة حفظها الله اوقفت الدعم عنهم !.

قال الشاب: كبير “يابو عصعص” وبحلم بيك انا بحلم بيك “يابو ذنبه” هالحين منهو اللي راح يطولك وشهر الخير على الابواب “لالا ما اقدر اصدق سفرتنا راح تخلي من تشريبة اللحم”  وبعده كلهم كم يوم ويجي عيد الضحية.. هي الحكومة وينها من غلا الاسعار شنهو هالشعب انا وانتم والناس اللي بالكويت مايتبعونها او هي حكومة على ناس غيرنا “افهم الموضوع” .. وراهم ما يلتفتون لمشاكل المواطن وين راحت توزيعات “الجواخير” واللا هي للمنافع بس هذال ولدنا وهذا منا وعادي يخليه استراحه يستفيد من ايجارها .. وطز بالمواطن وهمومه معقولة اللي قاعد يصير بالكويت المواطن من كل شي يشتكي  وين مايطقها يلقاها عوجا !, والله حنا شعب مانستاهل اللي يصير فينا ياحكومة الله يعين لو يصير عددنا مليونين جان قمنا ناكل بعض, اتقوا الله فينا ياحكومة وديري بالك علينا مدام الخير كثير تري كل شي يهون عند حاجة المواطن البسيط اللي كل همه عيشت عياله واهل بيته واذا ما راح تلحقون عليه راح يفتك فيه الغلا وينحره نحر. ما اقول إلا حسبي الله على من كان وراء نكد هالشعب الطيب المحب لبلده وياوطن كلنا نحبك كلنا نودك, ولاحول ولا قوة إلا بالله من هالرومانسية اللي راح تحل علينا قبل هالشهر الفضيل وبعده واتحزم يابو حنفي وارقص علشان نتعلم منك لان شكلنا راح نرقص كثير !.  

قال المتمولس: للبراءة ثلاثة وجوه في العالم وجه طفل ووجه إمرأة تبي تروح سوق, ووجه كويتي عند استلامه معاشه اخر الشهر، وعندما ضحك الجميع رفع على مسامعنا الشيخ زغلول اذان الظهر.