لا لا لا والله خبر ما يتصدق اكيد انا عم بحلم, ضحك الشاب لين طاح على ظهره ثم اضاف ابي واحد يقرصني , اخيرا صار عندنا سياح من اوروبا واميركا لا لا لا كبيره شوي بس مع هذا هلا وغلا وعمار ياكويت .
المعاق : “هلا بالعمام توها نورت الكويت وينكم من زمان” والله لكم وحشة ما غبيتوا تجون !”
الشايب :” اشوف عطوني الجريدة… ايييه والله سواح شوفوا كاميراتهم و”كشرهم” اللي منوره الصور, لا بعد ويقدعون من التمر ويشربون قهوة والله سواح صج… وشوفوا يرقصون بسيوف العرضه وعيد ياكويت يا احلي بلد ! . . بس وش اللي اشوفه هذولا سواح واللا تجار قواري اشوفهم كلن نازل بقاريه”.
الرجل :”عطني الجريدة اتفرج ايييه والله اجانب وقواريهم معهم… ان وش عرفك القاري من طقوس السياحة العالمية وهذا اللي نشوفه ان سافرنا كلهم علي قواريهم… الحمد لله اللي مد باعمارنا وخلانا نشوف الكويت يجونها السياح… ههههه خذ جريدتك وكمل الموضوع لنا” .
الشاب : “وهالرحلة السياحية هي الرابعة خلال موسمنا السياحي اللي يخلص اخر شهر ابريل, ويقول كبير المستقبلين ان مؤسسة المواني تقوم بعمل اللازم لاستقبالهم بعد انهاء اجراءات الفيزا حيث يقدم لهم الورد ويعمل لهم برنامج ترفيهي يركبون من خلاله الباصات لعمل جولات داخلية ومن ثم ارجاعهم الى الباخرة, وايضا كبير المستقبلين زف لنا البشرى بان بعض الخطوط الملاحية السياحية قد ابدت رغبتها بوضع الكويت في جدول رحلاتها للموسم السياحي المقبل… خاصة وان الكويت لديها من التراث والاصالة ما يؤهلها لذلك”.
المعاق “هيييه والله وصرنا بلد سياحي”.
الخبير : “هههه سياحة ايه اللي عندكو… انتوا فاكرين ان كم تمره وكام فنجان قهوة هيجيبول ليكو سواح سياحة ايه اللي خلال اربع ساعات بتخلص وفرحانيين بيها الجماعة هتودوهم فين وايه اللي عندكوا هي فين الاثار والمباني التراثية و,…و…و…يابني اقرأ كويس للناس الجهلاء اللي بالديوانية, بيقولك ودوا السواح لسوق المباركية والاسواق الشعبية مع المتحف الوطني, وكم بيت انا بقالي ثلاثين سنه بالكويت مش عارف اروح فين من ضيقة الخلق مفيش حاجه اروح ليها غير المطاعم والاسواق بس وديوانيتكم الموقرة اللي افرح لما اجيلها “.
الشايب : “هههه والله الخبير فضحنا… وكلامه عدل ما عندنا شي غير رحلة البر بالشتاء ومشاهد البحر من بعيد بالصيف لانه محجوز لناس على حساب ناس”.
المتمولس : “اكثر شخص ينرفزني اللي تسأله كم التاريخ يقولك هجري ولا ميلادي تقوله هجري يقول مدري طيب والميلادي , يقول مدري… وفي هذي الاثناء رفع علي مسامعنا الشيخ زغلول اذان الظهر”.
أضف تعليق