اللاعب أحمد العيدان يبي فزعتكم
ألووو .. ياأمم !

املح: يالله حيوه وحيوا القراء معاو.. والله يا اجلح صج الدنيا دواره؟.

اجلح الله يحييك ويحي المتابعين لنا.. خير يا العشير وش دار عليك رقبتي سدادة.

املح: الله يسلم رقبتك هذا العشم فيك.. اللي صاير بعض الآباء الله يهديهم مصخوها مرة وحدة. انت تذكر ايام قبل ان ركبنا مع ابونا وش كنا نسوي ان شغل راديو السيارة على الاخبار؟.

اجلح: ههههه مايبيلها كلام كنا نسمع وناكل تبن اعزك الله انت ومن يقراه!.. خير وش صار وش جرى؟

املح: اللي صار الابوان بزمنا هذا (ترزلو) وتمسخرو من عيالهم!.. ياسبحان الله الآيه. انقلبت العيال يحطون سيديهاتهم النقازية وخصوصا سيدي طني ورور والاب حفظه الله لهم يحذف غترته ويقول وانا قرعة قرعة ليه ليه.

اجلح: راحوا المتوحشين!.. بس اترك عنك هالسالفة انت ببطنك (بلا) اهرج قول علمني اللي عندك.. لأني عارفك ان جبت سالفة تضحك بقلبك (وجع) وتمهد له بسالفة على عكسه.

املح: يا حبي لك يا اجلح فاهمني السالفة ومافيها هي المناشدات الكثيرة بمواقع التواصل الاجتماعي من فيسبوك وتويتر واللي علمت فيها عن طريق المواقع اللي تطالب بإرسال اللاعب الدولي السابق احمد العيدان للعلاج بأمريكا بعد ان اوصى اطباء لندن بذلك.. كلهم وانا وانت معاهم نناشد وزير الداخلية بإرساله للعلاج على نفقة الوزارة التي يعمل بها.

اجلح: اللهم آمين الله يشفيه ولاتنسونه من الدعاء اعزائي القراء.. بس ما قلت لي يا املح وين راح المسؤولين اللي بهيئة الشباب والرياضة ووزيرها والناديين (هاليومين هم الاغنى بصفقاتهم ) اللي لعب فيهم وليش ما يتحركون وهم مثل مايعرف اهل الشارع الرياضي ان بعضهم شيوخ وتجار واعضاء مجلس أمة؟.. على الاقل ان ماحبوا يدفعون البلاء عنهم يتوسطون له ويسفرونه يتعالج.. الله اكبر عليكم يارياضيين وين شعار خل روحك رياضية اشوف طلع سالفة تنقال وبس بدون تطبيق!.

املح: انا طالبك لا تقسو عليهم يمكن مادروا عنه والا هم ناس فيهم الخير وبكرة راح تسمع الاخبار الطيبة عن فزعتهم لولدهم احمد العيدان وقل ما قلت لك.. وقبل الختام اطالب بخصم مبلغ بسيط من رواتب الاحتراف الجزئي للاعبين تكون نواة صندوق رعاية لهم عند الاصابة او الاعتزال تشرف عليه الهيئة وسلامتكم. 

ألووو اخير

كان هناك رجل جالس معه كلب (اعزكم الله) فمر عليه رجل حكيم فقال له: هاااه تعلمه الخيانة او هو يعلمك الوفاء؟.. رد الرجل: اقول توكل على الله لا هده عليك يعلمك سباق 400 متر حواجز!.

aloooyaomm@hotmail.com