اللي كتبه الزميل حسن موسى ونشر بجريدة الرأي الكابتن عنده حق بتعبيره عن الاستياء من تعاقدات النادي العربي مع لاعبين جدد.. وابصم له بالعشرة ورأي من رأيه بان جلب العديد من اللاعبين مو بس سيقلل من فرص الاعتماد على العناصر الشابة بالنادي بل ينهي طموحهم بالمرة.
وللأسف يابو محمد ان هذا المتبع باغلب أندية الكويت مو بس بالعربي لأن انديتنا صار عينها وعين اللي يلعب بالأندية الثانية أول مايسمعون عن لاعب تألق بمباراة قاموا يزاودون عليه..علما بان بعض اللي عندهم من اصحاب المهارات ولكن للأسف مدفونة ومنسية ينتظرون عين خبيره تبرزهم.. وكم واحد واحد سمعنا قصة نجاحه بعيدا عن ناديه الأصلي بِعد الاستغنا.
من وجهة نظري العربي فشل فشلا ذريعا بجلب اللاعبين المحليين وحتي لا ننسي اذكركم ان كنت ماني غلطان قبل موسمين أو ثلاثة تم جلب حوالي عشرة لاعبين بمراكز مختلفة بالنادي !..وش كانت النتيجة ؟.. بقى الوضع على ماهو عليه لا جديد يذكر!.
وغير هذا اتمني لو تقولون لي كم واحد منهم اليوم بصفوف الفريق الاول؟..متهيالي ثالثه أو أربعه والباقي اختفوا مع مرور الأيام لضعف المستوي هذا من جهة.
وأما من الجهة الثانية لتكملة استيائك فأنا ضد كلامك اللي تقول فيه انك مستاء من التعاقد قبل توليك مهمة إدارة كرة القدم .. معقولة يا كابتن ياكبير تفكيرك يوصل الي هالمحدودية بأنك تتشره بأنهم من المفروض يأخذون رأيك بعد تعينك بمنصب مدير الكرة والله خوش سالفة عجل وش خانت وجود المدرب بالفريق ؟.
أخاف انه مجرد اسم مدرب لا أكثر يا كابتن دول العالم المتقدمة بكرة القدم المدرب هو الكل بالكل..هو المسؤول الأول والله والأخير وهو من تقع على عاتقه طلب اللاعبين اللي محتاجه فريقه لانه هو المدير الفني ويعرف نواقص فريقه !.
وأما الإداري إداري مو أكثر لان مهامه ادارية بحته ومن غير المعقول السفينه يقودها ربانين وسلامتكم.
الووو أخير: «نوخذاوين طبّعوا مركب»
أضف تعليق