جرت العاده عند الغش التجاري المتضرر يلجأ إلى حماية المستهلك لعل وعسي يجيبون له حقه واغلب الأحيان لا تأخذ حق ولا باطل!.. يعني كل اللي كسبته هو شرف المحاولة لان الجماعة على طول يطلعون لك بألف حجه وحجه وكم موعد وموعد لين يخلونك تزهق وتنسي الموضوع برمته!
بيني وبينكم على الأقل اسمع الشاكي صوته ووصله لجهة رقابية بان حدثت له حالة غش بخصوص حاجة شراها وانغش فيها.. اما في الحالة اللي راح اكتب عنها فهي مختلفة والواحد مايدري وين يشتكي او يلجأ لمين؟.. واللي اقصده هو رسالة هاتفية جت على تليفوني قبل كم ليلة وعلى ما أظن جت الكثير وهي كالتالي “ميسي سواريز نيمار ثلاثي برشلونة يتنافسون منتخباتهم في كوبا أمريكا رد ب 8 ” وسعر المشاركة 500 فلس بالأسبوع المرسل رقم يتكون من خمس ارقام أوله تسعه والباقي معروف لكل واحد جته رساله مثلها.
وقبل لا تقولون يامال الفقر ياللي ماتستحي كلها نص دينار بالأسبوع تبيها حطها وإذا ما تبيها امسحها..اقولكم السالفة ماهي سالفة نص دينار بل الغش والنصب الذي أرسلوه لنا بالرسالة عن مشاركة هؤلاء النجوم بالبطولة والكل عنده خبر بعدم مشاركة نيمار لمنتخبنا بلاده لان برشلونة رفض مشاركته بالبطولة والحاجة الثانية فالاعب الاورغواني سواريز مصاب من مباراة النهائي لكأس اسبانيا يعني ببساطة المشارك ميسي بس.
ايييه ليش الغش والكذب على المشتركين لابارك الله بالطمع وهالحاله ما أدري منهو المسئول عنها هل هي وزارة المواصلات أو وزارة التجارة أم وزارة الإعلام أم مجالس ادارات شركات الهواتف المتنقلة العاملة بالبلد ؟.
هذي شكواى اليوم وقبل لا تستفحل الأمور وتكثر طرق النصب خصوصا على الشباب المتعصب رياضيا اللهم أني بلغت اللهم فاشهد وسلامتكم.
أضف تعليق