عن البراك والوشيحي والوسمي.. يكتب بدر المطيري

هذه ثاني رساله ارسلها لك يالوشيحي، الأولى كانت قبل سنتين تقريبا بخصوص موضوع دوامي وقلت لك يا ليتك…. (هنا شرَحَ صاحب الرسالة موضوع رسالته ومشاكل العمل) وهذه ثاني رساله، تحملني ماني محترف باللغه الفصحى، بس رسالتي مالها شغل بدوامي. ابفضفض لك.

هذه رساله اعتذار عن كل كلمة مسبه (شتيمة) قلتها لك بتويتر وقلتها بغيابك، وعلى فكره ترانا تواجهنا كذا مرة بساحة الاراده وبساحة قصر العدل، وجيتك وصورنا وياك انا وولد عمي وسولفنا، وجلست عندنا تقهوا انت وربعك اللي كانوا وياك، المهم قسم بالله يالوشيحي اني كنت مسحور وتوني انتبهت، يخوي انا كنت احبك واحب البطل، قسم بالله انه بطل ابوحمود مسلم البراك، وقسم بالله انه ينومس، حتى جرايد العالم تكلم عنه، واحب السعدون وكنت حاط صورته بتويتر هو ويا بوحمود بس مدري شلون قمت اسبهم والعنهم واقول انهم عشان مصالحهم وانت بعد عشان مصالحك، وسوالف حقيره، قسم بالله ان راسي مصدع كل ما ذكرت كلامي عنكم بتويتر. عسى الله يغفر لي والله اني مدري شقول.

انا واحد من الي اشتغلوا عليك شغل بتويتر، وعندي ثمان حسابات خليتها كلها عليك وعلى ابوحمود وعلى السعدون وعلى الحربئ وعلى الصواغ وعلى الطبطائي وعلى خالد الطاحوس وعلى كل شريف، علشان ادافع عن عبيد الوسمي، وتراني طلعت من تويتر والله شاهد علي بسبت (بسبب) هذه السوالف، كنا نسوي حسابات مالها عدد عشان نسبكم ونسبك انت بالخصوص لانك عورتنا يومنك ضربت عبيد ببرنامجك، ياخوك ترا كلامك يعور اذا تبي الصج ولو فيه بعض الحق.

تدري ليش لأنه انتبهت انا بس متأخر ويوم فكرت لقيت كلام اللي ينتقدون عبيد بتويتر صح، الرجال مايحارب (…) حيدر ولا يحارب ناصر (…) ولا عمره جاب سيرت (سيرة) علي (…) العنصري الحقير هو ويا علي (…) الي يبي يسجنون الربع، وما عمره مر على جريدة العفن الحقيره الي تشمتت فيه ورزت جويهل ولا يهاجم القلاف الي استانس على ضربه يوم استجواب فيصل المسلم، بس يهاجم البراك الي دافع عنه و ومايطلع راسه، ويهاجم الشعبي، وأمس واحد حط بتويتر مقطع لعبيد وياك ببرنامجك ايام النتخابات يوم كان يقول انا قريب للشعبي وللتنميه، ويوم نجح قام يطعنهم بظهرهم وحنا وياه صدقناه، وقام يقول لنا كلهم ضدي كلهم يبون المطران مايرفعون روسهم ويمشون ورا السعدون الي فيه ما فيه وحنا صدقناه وقمنا نسبكم ونلعنكم، بس يوم فكرت ولا (وإذا به) يهاجم ربعنا الأحرار قسم بالله احرار ويترك ربع حاتم، وبعدين قال بالنتخابات بكشف ملف (…) حيدر اول شي وما كشف شي ولا يحزنون، مغير يتحرش بمسلم البراك وابو حمود سافهه، ويهد ربعه عليه وعليك وانا واحد منهم نسبك بتويتر، وكانوا ربعه يقولون كل واحد يشوي (!!!) عشر حسابات ويحط صورة عبيد ويلعن والدين الوشيحي، واذا كتبوا شي يدزون لي على الدايركت يقولون سو رتويت واسوي رتويت بحساباتي كلها، واذا واحد مادش تويتر يدقون عليه وينك ياولد شفيك غايب، تقول عصابه، وانا مانتبهت لين شفت شبيحة (….) حيدر وحاتم يسون ريتويت لكلامنا عن بوحمود وعن السعدون وعنك انت بعد، اشهدنهم ملاعين خير. والله قهر.

عبيد يبي يحرق البراك والوعلان ومحمد هايف والدكتور خالد شخير عشان يقولون الناس مافيه الا عبيد وبس، ويومنه قال بشتجوب (سأستجوب) جابر المبارك طبلوله نبيل الفضل والقلاف ابوالريش وفيضل (…..) ونبيل والساقط اللاقط (….) و عبدالحميد (…) يعني هذولا ربعه الصجيين، مره واجهته في ساحة العدل وقلتله تفضل عندنا ولا يقول بجيكم بس انطر الوشيحي يقول لي انه يبيجي هالحين، وبعدين ماجيتونا انت وياه بس شفناكم بالقهوة وقعدنا عندكم اذا تذكر.

الرجال هذا فيه بلى (بلاء) يالوشيحي، ويسحر الشباب الصغار الي ما تعلموا، بقول كلام مايفهمونه ويقمرهم، بس انا رجال جامعي واستحيت من نفسي اصير مثل واحد قريت تغريدته يقول انا مافهمت شي من كلامك يادكتور بس انا وياك !!!!! وبعدين اقسم بالله انه مونس (…) حيدر وربعه والخرافي وييبون يسقطون بوحمود بس والله بعيده عن شواربهم.

صارلي يومين مغير اراجع تغريداتي واتعوذ من الشيطان واستغفر ربي، شلون صرت انا امشي وراه بدون مخ مثل المصابن واهاجم الناس الي امس احبهم وادافع عنهم، عشان واحد متكبر وك(…) شق ام الاغلبيه شق، واستاناس (فرح) مرزوق (…) وشلة من حيث الميدأ. اقص ايدي اذا مادعمه محمود (….) وحاتم بالنتخابات لأنه يطق بوحمود ويتفرجون ويستانسون. تكفا يالوشيحي شوف تغريدات الي تسبكم من الي يسويلها رتويت، بس اهم شي ادخل على الله ان تقول سامحتك في شهر رمضان، وانا بروح لبوحمود واقوله واعتذرله.

(وصلت رسالة لاحقة لهذه الرسالة بعد أن وافق على نشرها)

نسيت اقولك والله لوني ما احاتي زعل اخوي اني لكشف لك حسابي بتويتر بس هو رفيجه، وتراهو بدى يتضايق مثلي وناس واجد من ربع عبيد قاموا يحسون انهم مغير يسبون مسلم ونسو (أهملوا) الي كانوا يسبون البدو والمطران ويبوقون وقاموا يدزون رسايل بالدايركت يقولون لشبيحة قولوا ان ربع مسلم هم الي فرقوا القبيله، الوشيحي وسعد العجمي، ومحمد الجاسم، وقولوا عبيد ومسلم اخوان بس لو الله يفك مسلم من ربعه، يعني ان ابوحمود هو الي يتحرش. مع ان بوحمود ساكت وصاد عنه. وكل ما كتبنا شي عن جويهل ولا حاتم ولا اي (…) يدزون بالدايركت يقولون اترك سوالف حاتم، وخرابيط، تكفا شوف حساب (…) و(…) ما تلقا هجوم على احد غير مسلم والسعدون والوشيحي والشعبي والحربش والصواغ والوعلان وسعد العجمي ومنيف السراي.

اقسم بالله يعورني قلبي وانا اشوف عيال القبيله كل واحد يطق الثاني بتويتر كلها بسبت (بسبب) هذا ال(…).

يخوك يوم راجعت مواقفه من الي وياه ومن الي ضده، وقمت ارجع الذاكره ما كان يجي معنا في ساحة الارادة يوم سوالف الراشي، وابوحمود كل يوم هناك وانت اشوفك هناك، والله انقهرت وعرفت انه (….) ومساكين الشباب الي وراه.

المهم تراني استسمحك وحنا والعجمان ربعي وحنا قلب واحد، واستغفر الله من ذنبي.

 

بدر المطيري