أقلامهم

محمد الشمري: والله الجهراء ماهي بعيدة!

ألووو .. ياأمم
والله الجهراء ماهي بعيدة!
 املح: بالله هذا عذر .. ألا هذي مسخرة ما بعدها مسخرة ههههه!.
اجلح: بسم الله عليك يا املح وراك تكلم نفسك عسي ماشر؟ .. سلامات يالغالي هو الربع اللي باقي من مخك لذع والا راكبتك حرارة ام الرخوم؟.
املح  لا هذي ولا هذيك انا مثل الرهوان الابيض اترمح بكل مكان وحتي شفني اطامر مثل البخت برجلي الثنتين علي قولة معلقين قناتنا الثالثه الرياضية.
اجلح: لا لا رسمي انجنيت انا اسالك عن صحتك وانت تجاوبني بالمطامره ومش عارف ايش يقولون معلقين القناه الثالثة.. هذي وين وتلك اين؟ .. الظاهر تبي وزنيه مثل السيارات!.
املح : ههههه ضحكتني وانا مالي خلق اضحك يبه السالفة ومافيها قبل كم يوم .. بالتحديد يوم مباراة الجهراء مع نادي الكويت اللي جرت بملعب العيار تزينت وتعطرت وحلقت وكشخت وحطيت جل علي جوانب شعري اللي ماحاشها الصلع ورحت للملعب وبالخبره اخترت مكان (مسكت) من اللي دايما مخرجين المباريات يحطون عليه الكامرة .. ايييه نسيت للا اقولك وصيت ام العيال وعياله يتسمرون (بخششهم) جدام التلفزيون علي شان يشوفوني بالتلفزيون وانا واعدهم اقول لهم (بيباي) من يدي اليسار.
اجلج : هههه حلوه سالفتك كم بس قبل لاتكمل قولي اشمعني يدك اليسار مو اليمين ؟ 
املح : انا متوقع منك هالسؤال السر ومافيه الكل يشاورون بايدينهم اليمين .. وان شاورت باليسار راح يعرفوني اهلي ويسون مثلي ونقعد نسولف بهالشوفة لاخر السنة بس مثل مايقول المعلقين الحلو مايكمل ما كملت السالفة.
اجلح: خير وش صار ضيعت الملعب والا رحت لملعب ثاني او اكيد سيارتك خربت؟.
املح: لا لا لا ولا وحده منهم رحت للملعب بس سيارة النقل التلفزيوني هي اللي ماجت يقولون صار لها خلل فني هو اللي ماخل فرحت عيالي ماتكمل!.
اجلح: ههههه انت مصدق ان سيارة النقل راح تجي الجهراء يابن الحلال الجهراء ماهي بخريطتهم .. اشوف سيارتهم تتنقل بين المناطق كلها حتي الاحمدي وصلته يعني تبي تقنعني ان صارلها خلل فني! .. حتي لو فرضنا هالخلل وين باقي السياراة؟ .. او وين ورشة التصليح اللي تتبع الوزارة؟ .. يابوك الله لايتهم برئ مالهم نفس لمنطقتنا ولا هم هاضمينها هذا هو السر اللي الكل يحاول انه يتحاشاه بس علي مين؟ .. اقول خلنا ساكتين احسن لان هموم المنطقة كثيرة بكل المجالات ترها ماجت علي نقل مباراة.
 
ألووو اخير
 
من?الجهراء نتعلم الصبر وتحمل الاذية .. سالتوني انا من وين وهذه الهوية انا كويتي ولد كويتي وحياتي جهراوية.
 
محمد خلف الشمري
aloooyaomm@hotmail.com
Copy link