في ابيات شعرية اختلط فيها الغزل العذري بالسياسة ، نظم شاعر سبر بوبخيت قصيدة رائعة باح بها بحبه ووفائه للـ”محبوبة”، رغم جفائها ، يقول:
بكيـتك دمّ وانـتي ما بكـيتي
نسيتي خلّك الوافي نسيتي
أنــا مـا همّــنـي دمّــي و لـــكــن
عسى من دمعي الصافي رويتي
نسيتي كيف كانت لك يديني
تسوّي الارض لامنك مشيتي
بنيتي في حشايا قصر عامر
مليـكه فوق عرشه واستويـتي
أمـرتيـني ولبـيت الاوامـر
أطيع الامر وَنْـها لانهيتي
ألبّي لك ونا خافض جناحي
مـثـل مالـحرّ يِقـبل لا دعيـتي
سقيـتيـني خـمر حـبّـك مـعتّـق
فلا أصحى بعد منتي سقيتي
ولـكـنك بـعـد مــدّه نـكرتــي
علامك يا / هدمتي مابنيتي
رضـيت بحكمك القاسي علـيّا
صِمتّ ولا شكيت ولا رضيتي
فـلا اعـلم ذنـوبـي والخـطـايـا
وشلّي صار وخـلاكي قسيتي
حميتك من صواديف الليالي
ورحتـي للـغـربيين وشكيـتي
وكـم مــرّة و مــرّات احـتميـتك
حرام اليوم من حبي احتميتي
خراب البيت من قرب العواذل
عطيـتيـهم مفـاتيـحي وبيـتي
بلاي انـي شريتك يا حياتي
ولو بعتي بسوقي ماشريتي
لـجـل حـبّـك تحــمّـلت الخـطـايـا
واقول اخطيت وانتي ماخطيتي
جبرني قلبي الوافي عشانك
أقول اني سليت وما سليـتي
خذيتي أغلا ما فيني ورحتي
يكبْر اللي من الخافق خذيتي
إذا كان الوفـا أكبر ذنـوبي
عزاي اني وفيت ولا وفيتي
مثل يا حبّي مارحتي تجيني
وهلا بك يا عيوني كان جيتي
أنا الشعب الكويتي يا بلادي
أهيـم ولاعن اهمومي دريتي
انا الشعب الكويتي يا بلادي
وشوفيـني مســيره لعـتزيتـي
أنـا شعـبٍ وفـيٍ مـا يـخـونـك
ولو فرقـاي يا روحي نـويـتي
بعد ماسال دمي من عيوني
عرفت الدار ما ترحم كويتي
بو بخيت
BoBaKeeT@
أضف تعليق