رد كريم حسين، أدمن صفحة “إحنا آسفين يا ريس” المؤيدة للرئيس الأسبق حسنى لمبارك، على تصريحات عبدالفتاح السيسي، التي قال فيها إن “مبارك هو اللي جاب البلد على الأرض”.
وكتب حسين عبر صفحته على موقع التواصل الاجتماعي: ” اللي جاب البلد على الأرض هو اللي قال في 2010 أن راية مصر ستظل خفاقة تحت قيادة إبنها البار حسني مبارك، وطلع بعد ما مبارك مشي وقال أنا قولت من 2005 أنهم مش هيمشوا إلا لما يخربوها”.
وأضاف :”اللي جاب البلد على الأرض هو اللي حاكم وحاسب مبارك على قتل المتظاهرين مع أنه كان منزل حضراتكم من يوم 28 يناير، وهو اللي عمل نفسه مش شايف طنطاوي ولا باقى أعضاء المجلس ولا حاسبهم على مجزرة محمد محمود و مجزرة ماسبيرو ومجزرة إستاد بورسعيد، اللي جاب البلد على الأرض هو اللي ضحك على الناس وأخد منهم 68 مليار جنية في تفريعة عمال تخسر وبيسدد فوايدها من الأسعار اللي رفعها على الناس من النحية التانية، اللي جاب البلد على الأرض هو اللي تاجر بفقر المواطن الغلبان في القنوات والخطب وقام رافع عليه الأسعار وشايل من عليه الدعم المية والكهرباء والسلع”.
وتابع :”اللي جاب البلد على الأرض هو اللى ضيع 36 مليار دولار إحتياطى نقدي، اللي جاب البلد على الأرض هو اللي طلع وقال لوزير الأسكان أنا اللي بقولك ارفع أسعار الشقق، اللي جاب البلد علي الأرض هو اللي راح اعترف رسميا بسد النهضة ووافق علي إتفاقية إنشائه، اللي جاب البلد على الأرض هو اللي الدولار في عهده بقى ب10 جنية لأول مرة في تاريخ مصر”.
واستطرد :”اللى جاب البلد على الأرض هو اللى السياحة بقت صفر في عهده ،اللى جاب البلد على الأرض هو اللي جنوده عمال تتقتل وتتدبح وتستشهد كل يوم وتتصور فيديو وهو يروح يقولهم يارتني كنت أنا، اللي جاب البلد على الأرض هو اللي بيتعامل مع رجال الأعمال بسياسة شخلل علشان تعدى اللى عايز ميدخلش السجن يشخلل، اللي جاب البلد على الأرض هو اللى استعان برجالة الراجل اللى جابها على الأرض فى المناصب الوزارية والحكومية ،اللى جاب البلد على الأرض هو عمال يستلف قروض من البنك الدولى ضعف عدد القروض أللى استلفتها مصر في تاريخها ،اللي جاب البلد على الأرض هو اللي ضحك على الناس المرضى الغلابة بجهاز عبد العاطي بتاع الكفته وطلع في الأخر فنكوش”
واختتم أدمن صفحة “إحنا آسفين ياريس”: “اللي جاب البلد علي الأرض هو اللي عدد الجنازات في عهده بقت اكتر من عدد الانجازات “.
أضف تعليق