سبر القوافي

جيل الثمانينات !

محمد المسعري.. الخطير.. هنا.. 

شاعر استطاع أن يكتب مالا يستطيع أي شاعر عادي كتابته، أسلوبه الشعري ميزه مساحاته الشعرية ممتلئة بالماء.. و العشب.. 

عندما يكتب شعراً.. تغني له الأفئدة.. وتطرب له الآذان 

المسعري.. شاعر من النوع النادر..  

ويصافحنا هنا.. بنص أقرب ما يكون  للذوائق المتميزة.. 

قال فيه :

تحب القلوب قلوب تعشق.. بدون قيود   

  ولا تكره إلا قلب مطغيه حب الذات 

قطعت الدروب المتعبه.. ماقطعت وعود   

  ولا فاتني.. شكر الليالي على اللي فات 

على كثر ماحسيت بين القلوب / حدود   

  أبضحك وازعّل حاسد وعاذل وشمات ! 

حسبت المحبه كلمتين وعتب و ورود   

  قبل لا أعشقك بسكات وأعاتبك بسكات 

وقبل ما انفرد بإحساسك الطاغي المجرود   

  وأشوف بعيونك كلمة ( اقصد ).. وكلمة ( هات ) 

وفتحت الضلوع وقمت أغني هبوب النود   

  ولقيت ببهاك.. إبداع جيل الثمانينات 

تهب بتمثناك النسايم ودهن العود   

  ويفوح بحروفك شيح من روضة التنهات 

ويضيع الخفوق براحته.. بالوساع السود   

  ومهيب أول الضيعات .. ولا آخر الضيعات 

أجيب القصيده.. مالحقها ولا منقود   

  ولا جيت لك .. ماتطري إلا ثلاث أبيات 

على عنق ظبي .. وليل مابه نجوم .. وعود   

  ياصعبة ببدع المبدع .. وفي يد النحات 

تكرّم قبل لا يدرج اسمي تحت مفقود   

  لو اسمك مسجل بأول وبآخر الصفحات 

من الشوق.. ولاّ طلتك!؟ ماعليها زود   

  يا من تزرع ببسماتي الذبّل .. البسمات 

تعال إنت كلك .. جيّت الضايق / المحدود   

  بكامل شعورك.. لا تجيني على دفعات 

تراك أول أحلام العمر..  يا آخر العنقود   

  وترا ساعة غيابك .. ماهيب أبرك الساعات ! 

ولا جيت .. تخفي شوقك المرهف المعهود   

  تقل الوجيه .. وتختفي معظم الاصوات 

أحبك ولا لي غير الأربع حروف .. شهود   

  سوا نبرتي لا قلتها .. ويش اجيب اثبات ؟ 

اخاف يغدي قلبك .. بدرب ٍ مهو مسدود   

  ولا يذكر .. أدفا وأصعب وأجمل اللحظات 

وياخذك ظنك من يدين الوصل .. ويعود   

  نهار .. تتثاقل فيه حتى أسرع الخطوات

محمد المسعري

Copy link