نصيحة المتمولس عن التغيير!
محمد خلف الشمري
“الظاهر إن في كل دول العالم الناس يتعلمون من أخطائهم إلا ربعنا ” كل مالهم بزوود.. اللهم يا كافي مطنشين على الآخر، جن مالهم علاقة باللي يصير بالبلد، ومو بس هذا إلا ورافعين الجامات للآخر ماهم مخلين تنسيمة هواء حتى لو هي صغيرة”.. قالها الرجل وهو يكاد ينفجر من الغيظ.
المعاق: “هههه هونها وهي تهون, لا يطق لك عرق ونبلش بشرك ترى الشوارع زحمة لا الاسعاف تجينا ولا حنا بنقدر نسعفك بسرعة”.
الشايب: “فال الله ولا فالك الله لايجيب هالشي, لا له ولا لمسلم قول يابعدي محد حاس فيك إلا نفسك يالله غرد واطربنا ترى حنا اذانا مسلكينها علشان نسمعك .
الخبير: “ايوا ياعم السباك من يقدر عليك”!
الشايب: “انت وراك بديت بمسلسل المقاطعة بدري اخمد الله (يغربلك) خل نسمع الرجال انت ماعندك غير الضحك والطنازه على وضع مجتمعنا المحافظ”.
الخبير: “حامض على بوزك ههههه… ايوا ياسيدي قول ابوس ايدك عاوزين نسمع”.
الرجل: “سكتو خبيركم لا اشغل هالعقال على ظهره, انا اكاد انفجر من الغيظ وهو يتضحك… يرتفع الصوت بكل مكان من الديوانية من الجميع عين من الله خير وقول اللي مضايقك… امرتوا بخير سالفتي اليوم هي عن كم هالمشاكل اللي قاعد يصير بالبلد, قبل فتره احترق بير نفط بالروضتين واشوف الموضوع ماتحمله احد كلن باقي بمنصبه وهالملايين من الدنانير تبخرت بالهواء مع النار وياليت موضوع البير خمدت ناره إلا للحين وانا شايف النار للبارح مولعه… ومن باب من امن العقوبة اساء الادب, مناطقنا خاست بزبايلها صارت مشكلة النظافة بعد عقبها اللي ارعد فيها وازبد المجلس البلدي اللي ما خلا اعضاءه قناة ولا صحيفة ماتكلموا فيها عن هالامرا والنتيجة شنهي سالفة اثنين متداعمين بزحمة كل واحد يصلح سيارته(مع ان فيه واحد غلطان) بلا نطرة المحقق وسط هالزحمة علشان مايصيرون فرجة لخلق الله .. مخلين شعارهم باب يجيك منه الريح سده واستريح, ايييه لمتى ياربي هالتساهل مع الناس اللي تخطي ليش مايتحملون اخطاءه الجسيمة اللي يجي من وراها خساير بالمال وصحة العباد… الى متى ندفن رؤوسنا جدام اخطاء كبيرة ونطبطب على اهلها جن ماصار شي… لمتى المخطي مايتحمل خطاه, هههه, والله خوش سالفة الناس بالدول المتقدمة على اتفه سبب سحب نفسه وطلع من منصبه مستحي من نفسه, وحنا الناس عندنا للاسف يتبجح واحدهم… ويقعد ابد الابدين بمنصبه ويادار ما دخلك شر وعلى الناس المنتظره تسلم امرها لله وتموت ابرك لها”.
المتمولس: “سألوا سباك ايش الفرق بين المسؤول العربي والمسؤول الاجنبي قال سيم كرسي عربي وافرنجي… قالوا فهمنا … قال انت يبغا يغير افرنجي يفك مسمار واذا يبغي يغير عربي لازم يكسر حمام كله … وعند ضحك الجميع على فصلة المتمولس رفع على مسامعنا الشيخ زغلول اذان الظهر”.
أضف تعليق