طق طق باب الديوانية ينطق .. أقلط .. طق طق من بالباب، بابا بكاله بكاله أحلى كرار، روح طق الباب الثاني ترا عيالهم اصحاب الطلب مو حنا يابوك انت مو شايفنا قاعدين بديوانية قالها الشايب؟
الرجل: وش السالفة بقالة وطق طق وبعد توصل طلبات.. ياعمي شنهو هذا الظاهر انتم مو بالكويت هههه شنو مامر عليكم قرار تسكير البقالات اللي صدر قبل كم سنه؟
الشايب: هههه سنة حلوه يا جميل إلا جانا وسكر المرخص بس .. يابوك هذي بقالات ماركة من تحت الشليل مدام الناس نايمه للعمام التجار الجدد .
الشاب: وحده وحده علشان نصير بالصورة معاك نبي نفهم اشلون من تحت الشليل هذي جديدة ماقط سمعنا عنها؟
الشايب: يابوك هذي احدث الاختراعات اللي سوها جماعة ابو هناد بعد تفكير ما اخذ منهم وقت طويل .. أول ما تسكرت البقالات المرخصة بأمر المعنيين بالامر .. الجماعه حفظهم الله وحفظ قواريهم من السرقات والدعمات فكروا لنا بهذي الحيلة اللي ماتخطر في بال احد .. ولا انهم عباقرة مو مثل مانسمع عنهم بانهم مايفهمون علي طول عرفوا نقاط ضعف بعض المواطنين اللي تسيل سعابيلهم عند طاري القريشات ودفوهم دف بالدراهم اللي اعمت عيونهم .. ولهذا قاموا يختارون بيوت داخليه بعيد عن الشوارع وشرطهم ان لها حدايق جانبية .. واول مايتفقون مع الطماع اللي ماتهمه اصول الجيره يبنون لهم غريفه كيربي بالحوش ويحطون لها دريشه علي الشارع وعلي شرط معها تيلفون رسومه منزلية وهو استعمال تجاري يعني حتي وزارة المواصلات ضاحكين عليها وكل هذا بأسم المعزب لزوم التغطية .. واول مايخلصون التأثيث يلفون بقواريهم علي بيبان خلق الله ويوزعون ارقام تيلفونهم وكل اللي عليك الدفع وانت مبتسم ولدرجة انك ماتعرف لهم عنوان وكل شي متوفر من السندويتشات لين كروت الاتصال .. وبهذي المناسبة ياليت نصمت دقيقة حداد علي روح البقالات المرخصة اللي تسكرت بالقوة .. لو انها دابله جبودنا بس علي الاقل كان عليها رقابة مو مثل بقالات ابو هناد اللي الله العالم وش يبيعون فيها هل هو صالح او اخوه فالح للاستهلاك الأدمي؟.
الخبير: هو فيه ايه ياعم الحج حضرتك زعلان ليه ؟ .. مالجماعة الله يجزيهم خير بيوصلوا الطلبات لحد بيتك دلفري من غير رسوم.
الشايب: ياليتهم مافتحوها لانها صارت مرتع خصب لكل شي محرم هذا غير هروب الخدم كل يوم والثاني من بيوت الجيران والسرقات اللي تصير ببعض البيوت واتصالات دولية بالسرقة .. ياجماعة الخير الوضع هالحين تغير وصارت البقالات بالدس والخش لاحسيب ولا رقيب من احد وكل هذا بمباركة بعض الجيران اللي ما احترموا حقوق الجيره بسبب دناءة أنفسهم.
المعاق: ياليتها جت علي البقالات وبس إلا صارت فيه مطاعم ببعض الملاحق ومصابغ لغسيل الملابس ولعلمكم انا أعرف واحد علي دربي قلب ديوانيته لخياط حريم بمباركة من صاحبة الحسن والدلال ام عياله.
الشايب: كل شي ولا الدواوين .. افا دواوين الاباء والأجداد دشت باللعبة؟
الشاب: عجل شلون عجل كل هذا كوم ومواقف التكاسي الخاصة اللي سوها ببعض الاماكن بالمنطقة كل كم شارع فيه (سرا) لركوب سياراتهم وعلي عينك (ياحكومة) يااللي تشوف وخلها حسرة بقلوب اهل الكويت من اصحاب التكاسي اللي قاموا يكشون الذبان عن وجيهم من كثر ماهم ناطرين احد يركب معهم .. لا ونسيت لاقول لكم الاسعار بأرخص من حتي باصات النقل العام وين ماتبي تروح بالكويت اتصل وهم يصلون ويوصلونك.
الخبير : ناركم تاكل خشبكم زي ما بتقولوا انتم كوايته وتحلوها مع بعضيكم .. بس واللهي حلوه القفله اللي عاملينها المعنيين بالامر ! .. ياخرابي فيه حد يقفل المرخص ويرفع ايديه عن المتجاوزين دي جديده واختراع كويتي ميه ميه .. هههه الجماعه دول اذكياء مش زي محنا متصورين لا وكمان مطاعم فعلا انها مزهله ما بعدها مزهله.
المتمولس: سنتن من السنين كان الخميس عطله .. زين لقيت سالفه اقولها لعيالي .. ووسط ضحك ونحيب وولولات الحضور رفع علي مسامعنا الشيخ زغلول اذان الظهر.
محمد خلف الشمري
أضف تعليق