سبر القوافي

ألحين أنت وش تبي؟

“هلا يابوك هاه العلم بشر الله يبشرك بالخير… عاد ماوصيك شد حيلك ولا تفشلني تراني بذلت مجهود خرافي… تطلب مني تكاسي وقواري ومشي واصعد وانزل… هههه اضحك يابوك” قالها الرجل ثم نزل جهازه بالارض . 
الشايب: “خير وش السالفه  اسمعك تقول علوم البشاير وتفشيل ومجهودات فيها ذهاب واياب?”
الشاب : “وهو يضحك يمكن داش بطولة كاس, لان اللي اعرفه عنها ان فيها ذهاب واياب”! 
المعاق : “لا والله الظاهر انه واقع بورطه وماصدق انه خلص منها”! .
الرجل : “اي والله وانت الصاج سالفة ماجت على البال والخاطر, ولا كان في النيه افتر وانا الشاطر”.
الخبير: “عيني… عيني ايه ده ياعم ايه الحلاوه دي… بصوتك ده هتمسح من الذاكره ديو هشام عباس وحميد الشاعري الشهير “ايه العظمه دي ياباشا”… هيييه انت ياواد يابابو صب الشاي للراجل والجماعه اصله رجعلي الذاكرة خمس طاشر او يعني عشر سنوات لوراء” . 
الرجل : “الف مبروك عمرك الجديد ياسعادة الخبير… اقول واللا بلاش تدري مصمص مبسم شيشتك وخلني اكمل رعاك الله يا اخي, قبل يومين جاني الولد ومعاه كتاب نقل من ثانويته الى ثانوية ثانية والسبب هو زيارة الوزير للمدرسة .. ابن الحلال هو طب منيه وقبل لايقول اي كلمه عالجه الناظر (اغلبوهم بالصوت) بمصيبته بالمدرسة  وحنا بوجه الامتحانات النهائية للفصل الاول قال ايه ان عدد الطلاب عنده فوق الالف طالب واغلبهم مو من سكان منطقته .. فما كان من الوزير بعد هذه الشكوى إلا ان قال انقلهم لمناطقهم ! وبما ان منطقتنا مافيها ثانوية مثل ما انتم عارفين وسبق ان كتبنا عن هذا الامر قبل سنتين تحت عنوان ” النسيم يالتربية ما فيها ثانوية ” عطونا ورقة لثانوية صباح الناصر اللي بمنطقة العيون .. وبكل رحابة صدر قبلنا النقل ووديته للثانوية الجديدة .. واول ماجيناها قال الناظر ياهلا وسهلا بس والله نشاط ولدك الحر مو موجود عندنا ارجع لثانوية الواحه .. ركبت سيارتي و يوم جيتهم لهم قالوا خلاص شطبناه ودبر نفسك .. طرت قبل  لايطير العقل من راسي للمنطقة التعليمية ..سألت وين المديرة قالوا مجازه ? رح لفلان بمكانها يوم جيته قال والله ماعندي لك اي حل انا لي ثلاث اسابيع دوري هو بس اوقع وغيرها ماكو شي … تدري روح سو شكوى قلت على منهو ? انا ابي حل! ماطولها عليكم  حولني لمراقبة التعليم الثانوي يوم علمتها بالسالفة عطتني ورقة وقالت ارجع لثانويته القديمه وهم راح يعيدون تسجيله , وهذا ملخص الاتصال اللي جاني قبل شوي وبس خلاص”. 
الخبير : “ههههه والله امور بلدكم عجيبه هو فيه حد ياناس ياهوووه ينقل تلميذ مع نهاية الفصل دي حاجه حصرية فيكم , والله عجيبه امال الفلوس المتلتله اللي نازله عليكم زي المطر الجماعه بيعملوا فيها ايه … هما ليه مايعملوش مدارس تلم العيال بدل من مشورتهم بشوارع الجهراء, وطب ايه ذنبهم اهل النسيم بردك هما مواطنين وليهم حقوق?”
الشايب : “حسبي الله ونعم الوكيل سنتين من مقالتنا الاوليه لليوم ولباجر ماكو شي جديد ولا متوقع, ومع هذا نرجع ونقول زبدة الكلام (قبل لايقول مسؤول ألحين انت وش تبي? ) ياجماعة ابنوا لنا ثانويات بقسايم النسيم اللي قمتوا توزعونها .. او مابينا وبين الصناعية ارحمونا يرحمكم من في السماء ترى ارواحنا طلعت من هالمشوره اليوميه”! 
المتمولس : قبل الختام عندي رسالة للاخوة المشتين اخي المشتي للتذكير فقط لبسك الشتوي الخارجي مثل باقي الهدوم والملابس تحتاج للغسيل بشكل دوري اما انك تعاملهم معاملة العقال فهذا غلط ! وعند ضحك الجميع رفع على مسامعنا الشيخ زغلول اذان الظهر” .
محمد خلف الشمري    
bofahad42@hotmail.com
Copy link