شنهي الفايدة من البطولات العربية ؟! .
أملح : اسمع يا أجلح هالكم تغريدة اللهم اجعل كيدهم في نحورهم وتدبيرهم تدميرهم .. ان شاالله ينصرنا في عقر دارهم .. ويمكرون ويمكر الله والله خير الماكرين .. مهما عملوا لن يثنونا عن البطولة وكل واحد يعمل بأصله .. اخذنا ملعب المباراة للتمرين غصب عليهم !.
أجلح : هوووب هوووب وراك يا أملح عسى ماشر ؟.. رقبتي سداده علمني منهو اللي عايل عليك والله لا أخلي أذاني واذانه اربع هو منهو ؟ !.
أملح : هذا العشم فيك ياعزوتي هذي تغريدات أمين سر النادي العربي بتويتر يشتكي من معاملة الاخوة الجزائريين لبعثة النادي قبل مباراتهم النهائية على كاس العرب وختمها بانهم يعرفون انها لعبة اعصاب وماتطوف علينا .. لو اني عاتب عليه.
بكلمة كتبها يارب تكون زلة لسان تدور هو الأعراق وهذي مالها داعي.
أجلح : لا تلومه من حر ما بجبده هم استضافوهم أحسن استضافة وهذا طبع اهل الكويت يدللون الضيف ويخلونه جنه ببيته .. واللي صار شي متوقع وكلها تدخل ضمن الحروب النفسية والرجال بعظمة لسانه قالها حرب نفسية .. وللاسف هالطريقة على طول يستعملونها فرق الشمال العربي لأي فريق جاي يلعب عندهم .
أملح : منكم نستفيد زين وكامرات التلفزيونات اللي تصادرت واللي ردتها السفارة السعودية بعد ان عجز ربعنا تندرج تحت اي بند؟.
أجلح : انا طالبك تعفيني من هالسؤال لان ماعندي جواب له غير هم وينهم اعضاء السفارة ما كلموا الخارجية الكويتية دام وزير الشؤون الخارجية الجزائري عندنا وعلموه بالموضوع بدل من سم الله يحييك على عشاك.
أملح : هالسالفه يا أجلح متكرره مرات عديدة مع فرقنا حتى بالبطولة الاسيوية (الكلام لك ياريس بس عقب المباركة والترحيب) يحصلون مضايقات في بعض الدول يعني مانعرف طقاقنا عربيا واسيويا ؟.
أجلح : هالامور ماهي بايدينا كلها يتحملونها منظمين البطولات لانهم من المفروض يحذرون الفرق المستضيفة من الاخلال بواجبات الضيافة .. ان حصلت عندهم كذا مدخل يدخلون منه مثل اعتبار الفريق خاسر او خصم من مكافاته اللي هم يعطونه او يستبعدونه من البطولات نهائيا علشان يعرفون ان الله حق وان البطولات لها لوائح وأنظمه .. وان كان ولا واحد من اللي ذكرت يلغون البطولات ويحطون محاضرات بأخلاق المسلم وبكرم الضيافة العربية.
أملح : كلامك طيب بس اللي يحز بالنفس ان بعض الفرق للأسف روحها الرياضية صفر كل همها الفوز وبس وطز بالاخلاق وحسن المعاملة وهذا وحنا عرب ودينا واحد ! .. بالله ماتقولي شنهي الفايدة من البطولات العربية ان كانت أخلاقنا تجارية !.
أجلح : خل هالشعارات الرنانة تولي لان ماوراها اكل عيش لأن كل واحد يعمل باصل تربيته وأسال الله العظيم أنه يحبب أمة محمد ببعض وفالك يالأخضر الكاس.
ألووو اخير
سئل أحد الحكماء : لماذا أحسنت إلى من أساء إليك ؟ فقال لأنني بالإحسان أجعل حياته أفضل ، ويومي أجمل ، ومبادئي أقوى ، وروحي أنقى ونفسي أصفى.
محمد خلف الشمري
aloooyaomm@hotmail.com
أضف تعليق