ردّني شوقي
الشاعر.. بوبخيت
يا سبر من عقب غيبه ردّني شوقي
ردّ المحب الذي هاضت بـه اشـواقه
اشواق مابيّنت بعيون معشوقي!
لكـنـها في عيـوني حـيل حراقه
الشوق في غيبتي ايتل معلوقي
تلّ المـلَـك للـذي موتـه لـوا سـاقه
شوقن مشا في وريدي ينفض اعروقي
ابطا عـن الـوصل فـوق الـشهر مـاذاقه
شهرٍ وعشرين ما غـنيت طاروقي
واليوم هاض القريح اشواق شفّاقه
ماجبتها من رخـيص البيع فالسوقي
من وسط حدب الحنايا جات منساقه
فيها من الورد ظاهر عود زملوقي
عقب الجدب بانت الازهار واوراقه
ياسبْر في غيبتي كنّ الجبل فوقي
ضلعن من الهم فاق الحمل والطاقه
شلته ونا ما دريت المتن مفتوقي
اثر الهـموم القديمه تدبل افتاقه
ياسبْر في عيدك ادري اني مسبوقي
جـاكـم تهـاني مــن العـذال وارفـاقـه
اللي منعني كبـير الهم و العـوقي
واللي معه هم لا تنشد عن اخلاقه
لكن بهني عسى المطرود ملحوقي
مبـروك بـاقـولـها بـلـسان عـشـاقه
مـبـروك لـو كـان انـا قلـيت منطـوقي
حسبي على الهم كانه هاجسي باقه
@BoBaKeeT
أضف تعليق