شعراء سبر

يافارس اسمعني عسى اللاش يفداك

يافارس اسمعني عسى اللاش يفداك
‏يابوك حبْل العلْم لا جاك شدّه

بعطيك علْمن فيه من ذا ومن ذاك
واذْهن بعدها يا ولد لا تهدّه

اللي يودّك يوم ثمْ يوم يجْفاك
ما ينفعك لو طول عمرك تودّه

واللي ليامن غبت بالزور يقفاك
لا تامنه وان جاك بالزور ردّه

واللي يذيع اسرار غيرك ليا جاك
حبله على بيرك ليا غبت مدّه

واللي على المعروف يجحد عطاياك
لا شانت الدنيا شحيحن بمدّه

واللي تشوفه للمساتير هتّاك
سيفه على ستْرك وعرضك يحدّه

واللي تغيظه سمعتك بين الافلاك
لو شاف نجمك طاح ماهي تسدّه

واللي تشوفه شامتن في خطاياك
هاذا الحسود اللي توطيت خدّه

واللي مع اصحاب الرخا ما تعدّاك
منْتا بشايف فرّته يوم شدّه

واللي يوالي من جهر في معاداك
دايم يعادي من يواليك جدّه

هاذا بعض ماشفت .. وانتا بدنياك
بتشوف كان احياك ربي لمدّه

بوبخيت