سبر القوافي شعراء سبر

ثارت هواجيس الحنين الضواري

يا ليتني ماجيت باب الطواري
‏قلّب على قلبي جروح ومواجع

‏أثر الطّعن فالقلب ماهوب باري
وانا احسبنْ جرحي من العام ناجع

ثارت هواجيس الحنين الضواري
والشوق ثاير يوم افكر واراجع

من حين جيت الباب أظلم نهاري
كنّ الزمن عوّد على يوم فاجع

يوم ان ابويه في ممره يماري
صابر على سقْم الوجوع وتشاجع

‏زوله يورّالي يمين و يساري
كنّه على بيض الكرافيج هاجع

العين هلّت مزنها والعباري
والصدر فيه الورْق قام يْتساجع

لو الذي فيني على قلب غاري
ما ذاق في نومه لذيذ المضاجع

يالله صبّرني وأطلق هجاري
علّ المواجع عن خفوقي تراجع

آمنت بك واللي على العبد جاري
واللي خذاه الموت ماهوب راجع

وآمنت باللي في صحيح البخاري
مير المفراق بالغصب حيل ياجع

بوبخيت
@BoBaKeeT

أضف تعليق

أضغط هنا لإضافة تعليق